Бэрдьигэстээххэ М.Егоров аатынан сынньалаҥ киинигэр “PROFFI-2019” хамаанданан күрэс-куоҥукурус ыытыллынна. Эдэр исписэлиистэри билиһиннэрии, үлэлэрин-хамнастарын көрдөрүү, барыларын бииргэ түмүү, тыа сирин олоҕор көҕүлээһин буолар, диэн тэрийээччилэр эттилэр.


“PROFFI-2019” күрэхтэһии быйыл аан бастакытын ыытылынна. Ол иһин да буолуо, эдэр исписэлиистэр Бэрдьигэстээх тэрилтэлэриттэн эрэ кытынныллар. Ол курдук, хамаанадалары билсиҥ: “Кырачаан Ымыы” оҕо уһуйааныттан – “МОДУЛЬ”, Горнайдааҕы ДьуоКХ-тан – “Коммунальщики”, А.Осипов аатынан Бэрдьигэстээх орто оскуолатыттан – “Стимул”, Бэрдьигэстээхтээҕи Оҕо искусствотын оскуолатыттан – “ART STAR” , киин балыыһаттан – “Адреналин” , баһаарынай чаастан – “Горный ОГПС ”.

Бастакы түһүмэххэ хамаандалар бэйэлэрин билиһиннэрдилэр, иккискэ сыанаҕа турар улахан экран нөҥүө эрдэтинэ бэлэмнээбит үлэлэрин туһунан кэпсиир видео-ролигы, айар түһүмэххэ талааннарын, дьоҕурдарын көрдөрдүлэр уонна бүтэһиккэ идэлэрин таҥастарын муодалаатылар.

Алексей Аргунов, Бэрдьигэстээх нэһилиэгин баһылыгын солбуйааччы, күрэскэ дьүүллүүр сүбэнэн үлэлээтэ:

– Бүгүн олус сэргэх тэрээһини көрдүбүт. Бастыҥы быһаарарга бары даҕаны ыарырҕаттыбыт. Олус бэлэмнэммиттэр, чахчы чаҕылхайдар. Кэнники кэмҥэ, улууспутугар эдэр исписэлиистэр үлэлии кэллиилэрэ, олохсуйуута элбээтэ. Ол олус үөрүүлээх. Бүгүн бу сыанаҕа чаҕылхай, үлэлэрин сөбүлүүр эдэр дьон баалларын көрдүбүт, итэҕэйдибит. Кинилэри барыларын бииргэ түмэр инниттэн, улууска түмсүү тэрийиэххэ наада эбит диэн быһаардыбыт. Улууспутугар “Союз молодых специалистов” (“SMS”) бэрт тэрээһиннээхтик үлэлээбитэ. Ол сөргүтүллэр кэмэ кэлбит.

Саамай бэлэмнээхтэринэн “Стимул” I-кы, “Коммунальщики” II-ис, III-үс “Модуль” хамаанадалара буоллулар.

Баһаарынай чаас – “Горный ОГПС ” – “Саамай брутальнай хамаанда”, Бэрдьигэстээхтээҕи Оҕо искусствотын оскуолата – “ART STAR” – “Саамай креативнай хамаанда”, киин балыыһа – “Адреналин” – “Саамай түмсүүлээх хамаанда” диэн ааттары ыллылар.

Бары кыттааччыларга туоһу суруктар, анал ааттар, өйдөбүнньүк бэлэхтэр уонна тэрилтэлэрин салайааччыларыгар Махтал суруктар туттарылыннылар.

«Салгыы бу күрэс сылын аайы ыытыллан үтүө үгэскэ кубулуйдун. Улууспутугар үлэлиир эдэр исписэлиистэри үрдүккэ кынаттаатын, кэрэҕэ ыҥырдын«, — диэн кыттааччылар санааларын эттилэр.

Ааптар: Күннэй Алексеева, Горнай улууһа, «Үлэ күүһэ» хаһыат

2
0
comments powered by HyperComments