Сарсын, ыам ыйын 23 күнүгэр «Дьокуускай» судоходнай хампаанньа парома Дьокуускайтан Аллараа Бэстээххэ диэри, боруобалааһын быһыытынан, бастакы рейсин оҥоруоҕа, диэн edersaas.ru иhитиннэрэр.
«Хаҥалас улууһугар паромнар сырыылара эмиэ сарсыҥҥыттан саҕаланыаҕа», – диэн «Эдэр саас» сайтка СӨ тырааныспарын уонна суол хаһаайыстыбатын миниистирэ Семен Винокуров иһитиннэрдэ. Оттон Хаҥалас – Суотту хайысхатынан аны үс-түөрт күнүнэн (бээтинсэ-чэппиэр эҥэр) паромнар сырыылара саҕаланыаҕа.
Дьокуускай – Аллараа Бэстээх хайысхатынан быйылгы навигацияҕа 9 паром үлэлиэҕэ. Мохсоҕоллоох – Хачыкаат хайысхатынан 7, Хаҥалас – Суотту хайысханан 2 паром сылдьыахтара. Тарыып үрдээбэтэ, былырыыҥҥынан хаалла.
