Нам Бартыһааныгар оҕо саадын иитиллээччилэриттэн саҕалаан оскуола үөрэнээччилэрэ, учууталлара, ыччат, дьахтар сэбиэтэ, ветераннар, тэрилтэлэр үлэһиттэрэ, нэһилиэк дьоно-сэргэтэ бары кэлэн Таптал уонна дьиэ кэргэн скверигэр баар аллеяҕа анаан мас олортулар.


Бартыһааннар экологическай хайысхалаах  бырайыак быһыытынан «Фонд будущих поколений» гранынан үбүлэммит Таптал уонна дьиэ кэргэн скверигэр күргүөмүнэн мас олортулар. Дууһатын ууран мындырдык үлэлээбит урбаанньыт Н.Н. Петров нэһилиэгин дьонугар улахан бэлэх уунна. Сквер номнуо түмүктэнэрэ чугаһаата, уота-күөһэ уонна фонтана хаалла.

Күһүҥҥү үлэттэн быыс булан, дьон бука бары субуотунньукка үлэлээбитэ бартыһааннар түмсүүлээхтэрин көрдөрдүлэр. Тэрээһиҥҥэ кэргэннии Варвара, Егор Зыряновар, Галина, Валерий Соловьевтар, Людмила, Николай Соловьевтар уо.д.а. дьиэ кэргэттэрэ кэлбиттэрэ кэрэхсэбиллээх.

Парковай түөлбэ олохтоохторо оҕо былаһааккатын бэйэлэрин күүстэринэн туруордулар. Соторутааҕыта стела оҥоһуллубута. Нэһилиэк күн аайы киэркэйэн иһэриттэн дьон-сэргэ сүргэтэ көтөҕүллэр, олоҕун хаачыстыбата тупсар.

 Ааптар: Полина Скрябина

0
0
comments powered by HyperComments