Мэҥэ-Хаҥалас улууһун Балыктаах бөһүөлэгин иһинэн тэриллибит “Иэйии кытыла” айар куттаах дьон мустан түмсүү тэрийбиттэрэ биир сыл буолла.
Биир сыл иһигэр сүүрбэ биэс айар дьоҕурдаах түмсүү чилиэннэрэ хоһуйбут хоһооннорунан “Айар куттаах Балыктаах”хомуурунньук күн сирин көрдө. Манна Балыктаах бөһүөлэгин историятын, өр сылларга үлэлээбит үлэһит дьонун-сэргэтин ааттара киирбитэ хайҕаллаах. Маны барытын Анисия Скрябина, Марфа Ноговицина, Сардаана Трифонова муоһалаан, мунньан-сааһылаан таһаардылар.
“Туойабын төрөөбүт түөлбэбин” балаһаҕа айар дьон сүрэхтэриттэн-дууһаларыттан иэйии буолан тахсыбыт сэттэ ырыа, сүүрбэ хоһоон киирбитэ дьон биһирэбилин, билиниитин ылла. Ону таһынан кинигэ үс балаһатыгар 7 ырыа, 171 хоһоон наарданан ааҕааччы болҕомтотун үөһүгэр таҕыста.
Манна даҕатан эттэххэ, 800-чэ киһилээх улахана суох бөһүөлэктэн элбэх киһи хоһоон, ырыа айарын уруйдуохха-айхаллыахха эрэ сөп.
Кинигэ ааптардара Марфа Ноговицина, Мария Захарова, Евдокия Борисова, Николай Иванов, Марфа Харитонова Саха сирин биир бөдөҥ тэрилтэтин «Сахабэчээт» (салайааччы Филипп Пестряков) эҕэрдэ суруктарын тутан үөрүүлэрэ үксээтэ.
Ньургуйаана Скрябина –Сайдыына
РФ суруналыыстарын сойууһун чилиэнэ
