Алтынньы 26-27 күннэригэр «Саха сирин балыга — 2019» быыстапка-дьаарбаҥка Дьокуускай куоракка Хомсомуол болуоссатыгар буолуоҕа. Тыа хаһаайыстыбатын кээпэрэтииптэрэ, хотугу уонна Арктика кытылын улуустара, балыгы астыыр тэрилтэлэр кыттыыны ылыахтара. Бу туһунан Тыа хаһаайыстыбатын министиэристибэтин пресс-сулууспата иһитиннэрэр.
Бу күннэргэ Дьокуускай куорат олохтоохторо, ыалдьыттара муус анныттан бултаммыт сибиэһэй балыгы ылыахтарын сөп. Оҥорон таһаарааччылар сөбүгэр сыанаҕа чыыры, хатыыһы, муксууну, тууччаҕы уонна да атын Саха сирин өрүстэрин, күөллэрин көмүс хатырыктаахтарын атыыга таһаарыахтара.
Быыстапка кыттыылаахтарын култуурунай бырагыраама күүтэр. Хотугу норуоттар ырыалара-үҥкүүлэрэ, араас куонкурустар, ол иһигэр дьон саамай сөбүлүүр «Строганина» күрэхтэһиитэ ыытыллыаҕа. «Царь Рыба» аукцион, «Полевая уха» бу да сырыыга дьону түмэ тардыа. Бириистэр оонньонуохтара.
Санатар эбит буоллахха, маннык быыстапка-дьаарбаҥка быйыл 8-с төгүлүн ыытыллар.
This post was published on 24.10.2019 12:12 12:12