Бүгүн Аан дойдутааҕы уу хаачыстыбатын кэтээһин күнэ. Бу күнү 2003 сыллаахха Америкаҕа ыраас уу пуондата олохтообут. Бу күн дьон иһэр уутун хаачыстыбатыгар болҕомтотун уурар күнэ. Өрүстэр, үрэхтэр, күөллэр ууларын туругун билэр, тэҥнээн көрөр, ыраас буолалларыгар туруорсар күн.
Бу күн 1995 сыллаахха ССРС норуодунай учуутала, Саха сиригэр физмат оскуолалар хамсааһыннарын саҕалаабыт тэрийээччи, педагог, методист, Аҕа дойду сэриитин кыттыылааҕа Михаил Алексеев олохтон күрэммит күнэ. Михаил Андреевич саха омуга сайдыылаах, үрдүк техническэй билиилээх буоларын туһугар бүтүн олоҕун анаабыт, элбэх, аан дойдуга тиийэ биллиилээх учуонайдары иитэн таһаарбыт, научнай-техническэй интеллигенцияны үөскэтиигэ өлбөт-сүппэт үтүөлээх, саха норуотун интеллектуальнай күүстэрэ уһуктуутугар быһаарыылаах оруолу оонньообут киһи.
Балаҕан ыйын 18 диэн Грегориан халандаарыгар сыл 261-с күнэ (ордук хонуктаах сылга 262-c күнэ). Сыл бүтүө 104 күн баар.
Бэлиэ күннэр:
- Аан дойдутааҕы уу хаачыстыбатын кэтээһин күнэ
- Азербайдьан — Национальнай музыка күнэ.
- Ираан — Персия литэрэтиирэтин уонна поэзиятын күнэ.
Түбэлтэлэр:
- 1833 — Саха уобалаһын салайааччытынан коллежскай асессор Иван Голубев буолбут. Кини бу солоҕо 1834 сыл балаҕан ыйын 11 күнүгэр диэри сулууспалаабыт.
- 1927 — Конфедералистар хамсааһыннарын хам баттааһын кэмигэр ОГПУ Василий Никифоров — Күлүмнүүрү хаайбыт. Эһиилигэр кини Новосибирскай куорат түрмэтин балыыһатыгар 62 сааһыгар өлбүтэ. 1992 сыллаахха реабилитацияламмыта.
- 1931 — Мукден инциденэ буолбут, Кытайга Дьоппуон бас билэр Ляодун тумул арыытыгар тимир суол дэлби тэптэриллибит. Дьоппуоннар бу инцидени сылтах оҥостон сотору кэминэн Маньчжурияны сэриилээн ылбыттара.
- 1962 — Аллараа Халыма улууһун Черскэйиттэн (оччотооҕу аата Нижные Кресты) Чукоткаҕа Билибино бөһүөлэгэр көтөн испит Ил-14 көтөр аал саахалламмыт. Аалга олорсон испит 32 киһи бары өлбүттэр.
- 1997 — Сатыы сэриини утары миналары бобор туһунан конвенция ылыллыбыт (Оттава конвенцията).
- 2014 — Шотландияҕа тутулуга суох буолуу туһунан референдум ааспыт. Дьон үксэ, о.э. 55%, Улуу Британия састаабыгар хаалар туһугар куоластаабыт.
Төрөөбүттэр:
- 1832 — Сергей Боткин — Арассыыйа аатырбыт бырааһа.
- 1858 — Константин Неустроев — Урсик — народник-революционер, сахаттан биир бастакы учуонай. 1881 сыллаахха Петербурдааҕы университет физико-математическай факультетын ситиһиилээхтик бүтэрбит саха бастакы үрдүк үөрэхтээхтэриттэн биирдэстэрэ.
- 1915 — Иван Готовцев — РСФСР уонна Саха АССР оскуолаларын үтүөлээх учуутала, Саха АССР култууратын үтүөлээх үлэһитэ, кыраайы үөрэтээччи.
- 1959 — Карл Сергучев — Суорун Омоллоон аатынан Опера уонна балет тыйаатырын уус-уран салайааччыта, Саха Өрөспүүбүлүкэтин искусствотын үтүөлээх диэйэтэлэ.
Өлбүттэр:
- 1995 — Михаил Алексеев — педагог, методист, ССРС норуодунай учуутала. Саха Сиригэр физмат оскуолалар хамсааһыннарын саҕалаабыт тэрийээччи.
