Баатара нэһилиэгэр Борисовтар өссө биир хотону туттулар. Уоллара Афанасий былырыын 2,5 мөлүйүөн солкуобай суумалаах граны ылбыта. Ол харчыларыгар «Беларус» тыраахтар, оту дьапталҕалыыр, охсор тиэхиньикэ, хотоннорун матырыйаалын ылбыттара. Сорунуулаахтык саҕаламмыт үлэ түмүгэ да үтүмэн.


Баатараҕа саҥа хотону үлэҕэ киллэрбит Афанасий Борисов хаһаайыстыбатын тэринэригэр үлэлэрин хайдах саҕалаабыттарын  кэпсээтэ.

Билигин хотоммутугар 29 сүөһү турар, ‒ диэн кэпсээннээх буоллулар ини-бии Афанасий уонна Евгений Борисовтар, кинилэр ийэлэрэ Василиса Андреевна. ‒ Төрүүр сүөһүлэри Балыктаахтан, Бэдьимэттэн уонна Сыымах иһиттэн атыыласпыппыт. Элбэтиэхпит иннинэ 13 сүөһүлээх этибит. Кыра кыралаан сылтан сыл атыылаһан элбэтэн испиппит. Сүөһүбүт ахсаанын бастакы улаханнык элбэтиибит буолар. Хотон тутуутун былырыын саҕалаабыппыт. Арааматын туруорбуппут. Быйыл бүтэрдибит.

Хотоннорун эркинин кыратык иҥнэри гыммыттара холлоҕоһу санатар эрээри, синньигэс соҕус бэрэбинэлэри ортолорунан аҥардаан туруортаабыттар. Тас өртүн профлииһинэн бүрүйбүттэр. Лиис уонна хайытыллыбыт бэрэбинэлэр икки ардыларынан изоспааннаабыттар уонна икки хос изовердаабыттар. Онон, сылааһы бэркэ тутар эркини толкуйдаабыттар. Хотон 20 да 10 миэтэрэ усталаах-туоралаах буолбут. Таһыттан көрдөххө дьоҕус курдук эрээри, иһигэр киирдэххэ, сүөһүлэр балачча холкутук, симсибэккэ тураллар. Сорох сүөһүлэрэ кэлэ иликтэр этэ, аймахтарыгар туруоралларын эппиттэрэ. Сэтинньи 8 күнүгэр сылдьарга, Сыымахха идэһэ үгэнэ буолан, ыал аайы сүөһүлэр көҥдөйдөрө, көхсүлэрин аҥардара, бууттара тэрээһэлэргэ, дьиэлэр кыһын тоҥоруллар киирии аҥардарыгар сыталлара. Тэлгэһэлэргэ сүөһүнү астыы-үөллүү да сылдьааччылар бааллара. Борисовтарга биир оннук хартыына этэ. Түөрт сүөһүнү туттубуттарын эппиттэрэ. Дьиэ иһигэр эти быһыы-отуу үлэтэ бара турара. Таһырдьа Афанасий Афанасьевич грант усулуобуйатынан дьиэ туттуохтаах буруус мастара кыстанан тураллар. Саҥа күөх тыраахтар үлэлээн тиҥийэрин кэтэһэн иһийэн турар. Улахан оту дьапталҕалыыр тэриллэрэ кыһыл кырааскатынан маҥан хаар үрдүгэр багдайар.

Борисовтар сүрүн кыһалҕаларынан ходуһа тиийбэтэ буоларын ыйаллар. Ылбыт сирдэрэ быйыл ууга барбыт. Былырыын эмиэ уулаах турбут. Ол гынан, отторо тиийэрин этэллэр. Кур оттоохторо эрэли үөскэтэр. Кыбыыга алта кэбиһиилээхтэр. Быйыл от оннугар бурдук, уотурба атыылаһарбыт буолуо дииллэр. Отторун үксүн урулуоннуулларын ордороллор.

Афанасий уһаайба сирин ылбыт. Дьиэ туттарыгар грантан 275 тыһыынчатын туттан отчуоттуохтаах. Икки оҕо аҕата. Убайа Евгений Дьокуускайга олорор, биир оҕолоох. Дьонугар хотон үлэтигэр көмөлөһө кэлбит, онон, Сыымахха кыстыыр былааннаах сылдьара. Сайынын тутуунан дьарыктанар, бэйэтэ биригээдэлээх.

От-мас үлэтин кыайабыт, ‒ диир Евгений Афанасьевич. ‒ Тыа сиригэр сүөһүлээх эрэ киһи аһын-үөлүн булунан олорор. Сирбит тиийбэтэ моһуохтуур. Дьоннор ходуһаларын эйиэхэ босхо уларсыбаттар. Туһаныллыбакка турар сир элбэх. Манна биэс сыл оттоммотох биир алаас баарын билэбит.

Ыал ийэтэ Василиса Андреевна оскуолаҕа техническэй үлэһит. Аҕалара Афанасий Васильевич сопхуос үлэтин бэтэрээнэ. Төрүт-уус сыымахтар. Түөрт оҕолоохтор. Олохторун-дьаһахтарын сүөһүтэ суох санаабаттар. Сылгы ииппэттэр. Биир эрэ сылгылаахтар.

Ааптар: Аркадий ИННОКЕНТЬЕВ. 

0
0
comments powered by HyperComments