РФ Киин быыбардыыр хамыыһыйата Россия бэрэсидьиэнигэр РФКП хандьыдаат Павел Грудинин 13 счетугар Швейцария бааннарыгар 1 мөл $ доллар кэриҥэ, ол иһигэр 174 унция кыһыл көмүс сытарын быһаардылар. Бу туһунан “Россия24” телеханаалга РФ Киин быыбардыыр хамыыһыйатын бэрэссэдээтэлин солбуйааччы Николай Булаев иһитиннэрдэ.
Кини этэринэн, 2017 сыл ахсынньы ыйыгар Грудинин Швейцарияҕа 13 счеттаах уонна атын үп инструменнардаах этэ.
Грудинин тохсунньу 12 күнүгэр хандьыдаат быһыытынан регистрацияламмыта. Сокуон быһыытынан регистрацияланар кэмигэр туһааннаах хамыыһыйаҕа кыраныысса тас өттүгэр счета уонна атын үбэ суоҕун ыйыахтааҕа.
Бэйэтин докумуоннарыгар Грудинин тас дойду бааннарыгар 5 счету уонна сыаналаах кумааҕыларын ыйбыта.
Олунньу ый ортотугар Булаев иһитиннэрбитинэн, Грудинин Киин быыбардыыр хамыыһыйаҕа тас дойду бааннарыгар баар бары счеттарын сабарын туһунан икки төгүл эппит.
Тустаах хамыыһыйа чилиэнэ Александр Кинев кулун тутар 5 күнүгэр Швейцария нолуогун уорганнара Грудинин өссө 11 счеттааҕын, итинтэн биирэ кыһыл көмүһүнэн ууруллубутун туһунан иһитиннэрбиттэрэ.
