29 Кулун тутар 29.03
  • -14°
  • $ 92,26
  • 99,71

Баһаартан эмсэҕэлээн дьиэтэ суох хаалбыт Тарабукиннары «Үтүө санаа кынатынан» өйүөҕүҥ

13:43, 19 апреля 2017
Текст:
Читайте нас на
Яндекс Новости
ЯДВ

Муус устар 19 күнүгэр 18 чааска Өксөкүлээх аатынан Норуоттар доҕордоһууларын дьиэтигэр, баһаартан эмсэҕэлээн дьиэтэ суох хаалбыт Тарабукиннары өйөөн, доҕотторо — Сергей Зверев аатынан үҥкүү национальнай тыйаатырын артыыстара уонна “Туймаада” судаарыстыбаннай ансаамбыл холбоһуктаах аһымал кэнсиэргэ ыҥыраллар.


Саргылаана уонна Андрей Тарабукиннар быйыл олунньу 14 күнүгэр үс уол оҕолорун кытта умайа турар дьиэлэриттэн кыл мүччү ойон тахсыбыттара.

«Ол күн эбиэппин бэлэмнии сырыттахпына улахан уолум: “Туох эрэ тыаһаата!” – диэн хаһыытаабытыгар, таһырдьа өҥөйөн көрбүтүм, гарааспыт умайан эрэрэ. Дьиэбитин кытта сыста турар буолан, уот дьиэбитин эмиэ тута хаппыта. Оһохпут кыымыттан баһаар барбыт этэ. Гарааспыт каркаас уонна полистироллаах тутуллубут буолан, соҕотохто күүдэпчилэнэн тахсыбыта. Баһаарынайдары ыҥырбыппыт да, 20 мүнүүтэ буолан баран кэлбиттэрэ. Күүппүт санаабытыгар наһаа уһун курдуга», — диэн кэпсиир ыал ийэтэ Саргылаана Тарабукина.

Ити курдук, 7х8 кв. м иэннээх дьиэлэриттэн соҕотохто матан, Тарабукиннар орто уонна кыра уолаттарын кытта билигин култуура коллеһын урукку уопсайыгар биир хоско олороллор. Онтон улахан уоллара, 17 саастаах Өркөн, Тулагыга эбээтигэр олорон үөрэнэр. Кини ФЭИ иһинэн үлэлиир гуманитарнай колледж 2-с кууруһун устудьуона.

Айар куттаах эдэр дьон 1999 с. култуура коллеһыгар үөрэнэ сылдьан ыал буолбуттар. Кыыс Чурапчыттан, уол Сунтаар Күндэйэтиттэн төрүттээхтэр. Саргылаана Сергей Зверев аатынан үҥкүү национальнай тыйаатырын артыыһа. Андрей “Туймаада” судаарыстыбаннай ансаамбыл солиһа. Эйэлээх дьиэ кэргэн “олорор дьиэтэ суох хааллыбыт” диэн ыһыктынан кэбиспэккэ, күүстээх санааларынан быйыл сайын саҥа дьиэ туттан киирэр баҕалаахтар. Ол иһин, хайдах кыалларынан үп көрдөнө сатыыллар.

«Ыарахан кэммитигэр үтүө санаалаах дьон биһиэхэ күүс-көмө буолан, илиилэрин утары ууммуттара. Ол курдук, орто уолбут Айтал алтыс кылааска үөрэнэр Саха гимназиятын учууталлара, үөрэнээччилэрэ, төрөппүттэрэ көмөлөспүттэрэ. Бэйэбит аймахтарбыт өйөөбүттэрэ. Аны бииргэ үлэлиир доҕотторбут аһымал кэнсиэр тэрийэн эрэллэр. Онон дьоммут-сэргэбит көмөтүнэн быйыл сайын дьиэбитин туттан киирэр санаалаахпыт», — диэн  ыал ийэтэ санаатын үллэстэр.

Саха киһитэ өбүгэ саҕаттан ыарахан балаһыанньаҕа түбэспит дьоҥҥо көмөлөһөр айылгылаах. Таптал уйаламмыт элбэх оҕолоох саха эдэр ыала бу сайын ньээкэ уйаларын туттан киирэллэригэр өйөбүл буолуоҕуҥ!

“Үтүө санаа кыната” аһымал кэнсиэр билиэтэ — 500 солк. “Санаабытын түһэрбэппит”, — диэн эрэх-турах санаалаах элбэх оҕолоох эдэр ыалга ким баҕарар көмөлөһөр кыахтаах.

edersaas.ru

Следите за самым важным и интересным в Telegram-канале и WhatsApp-группе ЯСИА
Тутаах тыллар