Аныгы кэм сиэринэн, бу дьыл сэтинньи 4-26 күннэригэр Бүтүн Россия үрдүнэн “Мин таптыыр музейым” диэн онлайн-куоластааһын ыытылынна. Россия олохтоохторо олус активнайдык бу конкурска кытыныллар. Барыта 1600 араас таһымнаах, федеральнай, национальнай, региональнай, мемориальнай, художественнай уо.д.а. музейдар кыттыбыттар. Ол истэригэр Аан дойдуга аатырбыт Эрмитаж, Нуучча музейа, Третьяковскай Галерея, “Исаакиевский собор”, Московскай Кремль музейа курдук буолаллар. Бу конкурс официальнай түмүгүнэн Ем. Ярославскай аатынан Хотугу норуоттар историяларын уонна культураларын холбоһуктаах Саха государственнай музейа 20-ис миэстэҕэ С-Петербург аатырбыт Нуучча музейын кэнниттэн тахсыбыт. Бу сүрдээх улахан ситиһии, кыайыы. Холобурга, Третьяковскай Галерея 37-ис миэстэ буолбут. Дальневосточнай округтан Саха музейын тэҥэ Бурятия музея 50 бастакыларга киирсибит.
Саха музейа доҕотторугар, партнердарыгар, сүгүрүйээччилэригэр дириҥ махталын биллэрэр уонна ахсынньы 13 күнүгэр музейбытыгар “Аһаҕас аан” – диэн тэрийэн ыытар дьаһалларбытыгар ыҥырабыт. Бу күн музейга киирии босхо, фондаҕа харалла сытар сэдэх малларбытын, экспонаттары көрдөрүөхпүт, босхо экскурсиялары тэрийэбит. Бу үөрүүлээх күммүтүгэр музейбытын байытар сэдэх хаартыскалартан, маллартан, докумуоннартан, наҕараадалартан үөрүүбүт дөксө үрдүүрэ чахчы.
Саха музейын директора,
Россия музейдарын Союһун Президимун Бочуоттаах чилиэнэ,
РФ уонна СР култуураларын үтүөлээх үлэһитэ,
Духуобунас Академиятын Бочуоттаах Академига
Дьөгүөр Шишигин.
This post was published on 12.12.2018 17:00 17:00