Бу туһунан бу улуустарга уунан хааччыйыы эбийиэктэрин саҥардан оҥорууга уонна тутууга этиилэри үөрэтэр оробоучай бөлөх бастакы мунньаҕар этилиннэ.
Соторутааҕы Үөһээ Бүлүүгэ Саха сирин Ил Дархана Айсен Николаев ыыппыт көһө сылдьар мунньаҕын кэмигэр СӨ бырабыыталыстыбатыгар “алмаастаах провинция” оройуоннарын ыраас уунан хааччыйыы кыһалҕаларын быһаарыыга сэтинньи 16 күнүгэр диэри этиилэри киллэрэригэр сорудахтаммыта.
“Бүлүү улууһа” МТ баһылыгын солбуйааччы Андрей Лобашев Бүлүүгэ баар сууккаҕа 300 кубу ыраастаан таһаарар водозабор кыамтата кыайбат, маннык кыһалҕа Кыһыл Сыырга эмиэ турар.
Староватов уонна Тоһу сэлиэнньэлэригэр ыраастыыр тутуулар олох да суохтар. Олохтоохтор күөл уутунан олороллор. Манан сибээстээн, муниципальнай оройуон “СӨ ОДьКХ” ГУП хочуолунайын баазатыгар иһэр ууга аналлаах ыраастыыр тутууну тутарга этии киллэрдэ. Маны сэргэ сорох нэһилиэктэргэ уу таһар массыынаҕа наадыйаллар.
“АЛРОСА” АК кылаабынай энергетигэ Андрей Тархов санаатынан, бастатан туран, бу бырагыраамаҕа ыраастыыр тэрилэ суох нэһилиэнньэлэр киириэхтээхтэр. Ол эрээри, чопчу этиилэри бэлэмнииргэ уунан хааччыйар эбийиэктэр тэхиньиичэскэй туруктарын туһунан чахчылар ирдэнэллэр.
Уу таһар массыыналарга тохтоотоххо, “АЛРОСА” АК кэлэр сылга Бүлүү улуустарыгар 20 анал тиэхиньикэни биэриэҕэ.
СӨ ОДьКХ уонна энергетикэ миниистирин бастакы солбуйааччы Николай Дураев муниципальнай тэриллиилэр баһылыктарыгар туһаайан бырагыраамаҕа этиилэри толкуйдаахтык киллэрэллэригэр сүбэлээтэ.
Сунтаар оройуонун баһылыгын бастакы солбуйааччы Николай Александров Бүлүү эбэ киртиийитин кэмигэр нэһилиэнньэни иһэр уунан хааччыйыыга ылыллыбыт суһал тэрээһиннэр чэрчилэринэн муниципальнай тэриллиилэргэ тахсыбыт ороскуоту толуйуу туһунан боппуруоһу көтөхтө.
“АЛРОСА” АК Социальнай сайдыыга управлениетын начаалынньыгын э.т. Юлия Васюкова этэринэн, чугастааҕы кэмҥэ Хампаанньа кэтээн көрөр сэбиэтин көрүүтүгэр эмсэҕэлээбит оройуоннар ороскуоттарын кэрискэтэ көрүллүөҕэ.
This post was published on 06.11.2018 13:51 13:51