Бүлүү улууһун оскуолаларын 1983 сыллааҕы выпускниктара Саха сирин араас муннуктарыгар олороллор. Кинилэр үтүө санаанан салайтаран, кэскиллээҕи кэрэһэлээн, олох ыарахаттарыгар түбэспит оҕолорго бэлэх туттардылар. Оттон «Кэнчээри» оҕо тэрилтэтин иитиллээччилэрэ бэйэлэрин оҥоһуктарын бэлэхтээтилэр.
Ааспыт бээтинсэҕэ Бүлүү куоратын саастарын ситэ илик оҕолору көрөр “Кэнчээри” киин дьиэтэ оҕо үөрбүт-көппүт саҥатынан, дьоллоох күлүүтүнэн туолла. Бу күн кииҥҥэ күүтүүлээх ыалдьыттарынан Бүлүү улууһун оскуолаларын 1983 сыллааҕы выпускниктара буоллулар. Кинилэр икки улахан дьааһык, биир сиэккэ араас оонньуурдары, итии-тымныы ууну бэлэмниир омук кулерын тутан киирбиттэрин үлэһиттэр, оҕолор үөрэ-көтө көрүстүлэр.
Выпускниктар эрдэ ыыппыт дьиэ үрдүттэн муостаҕа тиийэ ыйанар кэрэ көстүүлээх остуоралара оҕолор оонньуур улахан хосторугар ыйаммытын, киирбит-тахсыбыт бары сэргии, сэҥээрэ көрөллөрүн үлэһиттэр кэпсээтилэр.
Киин үлэтин, дьиэтин-уотун, оҕолору, үлэһиттэри кытта директор Егор Дашевскай билиһиннэрдэ, түмсүүлээх выпускниктарга махтал тылларын эттэ, кинилэргэ анаан Махтал суругу, анал харысхалы, оҕолор оҥорбут оҥоһуктарын туттарда.
Дьоро киэһэ выпускниктар ааттарыттан тыл эппит Кыдана Дорофеева, Саргылана Павлова 1983 сыллааҕы выпускниктар өрөспүүбүлүкэтээҕи түмсүүлэрэ тэриллибитин, Бүлүү улууһун выпускниктара бастакы үтүө санаа тэрээһинин быһыытынан кырачаан оҕолорго көмө оҥорорго быһаарбыттарын кэпсээтилэр, киин үлэтигэр ситиһиилэри баҕардылар.
Выпускниктар “Кэнчээри” үлэһиттэригэр, оҕолоругар түмсүү кыттылаахтара бэлэмнээбит бэлэхтэрин үөрүүлээх быһыыга-майгыга туттардылар.
Бүлүүгэ ыытыллыбыт үтүө санаа тэрээһинин Саха сиринээҕи “1983 сыллааҕы выпускниктар” түмсүүлэрин элбэхтэн биир эрэ холобур быһыытынан көрүөххэ сөп. Түмсүү кыттыылаахтара олорор улуустарыгар, ол эбэтэр Саха сирин үрдүнэн быйыл күһүн бөһүөлэктэр көстүүлэрин тупсарар субуотунньуктар, мас олордуута уонна да атын араас үчүгэй, туһалаах элбэх тэрээһиннэр ыытылыннылар.
Быйыл сайын 1983 сыллааҕы выпускниктар, оскуоланы бүтэрбиттэрэ 35 сылыгар, өрөспүүбүлүкэ үгүс улуустарыттан түмсэн, Дьокуускай таһынааҕы Ил-Эйгэ туонатыгар көрсүһүүнү тэрийбиттэрэ. Ил олохсуйар, Эйгэ кэҥиир көрсүһүүтүгэр сүрэхтэммит түмсүү өрөспүүбүлүкэ уопсастыбаннай, социальнай олоҕор биллэр-көстөр суолу хаалларыа, өссө да элбэх сонун тэрээһиннэри тэрийиэ диэн эрэниэххэ.
Ааптар: Николай Куприянов
This post was published on 01.10.2018 12:38 12:38