1996 сыллаахха педагогика Бүлүүтээҕи училищетын бүтэрбит 19 учуутал уонна педагогика хайысхатынан үлэлии сылдьар выпускниктар үөрэммит кыһаларын устудьуоннарыгар аһаҕас уруоктары ыыттылар.
30 сыллааҕыта бөлөхтөрүгэр Сергей Чолбодуков, Федя Дмитриев диэн икки эрэ уоллаах кыргыттар хамаандалара идэ ылаары үөрэнэ киирбиттэрэ. «Кинилэри учуутал идэтигэр уһуйбуттара РСФСР үөрэҕириитин туйгуна Д.Г. Протопопова, СӨ үөрэҕириитин үтүөлээх үлэһитэ, методиһа Л.К. Никифорова. «Үчүгэй салайаачыларга түбэһэн оҕолор күн бүгүҥҥэ диэри билсэллэр, көрсөллөр, өйөһөллөр, үөрэммит кыһалырын кытта сибээстэрин быспаттар. 20 сылларыгар эмиэ манна кэлэн турардаахтар», — диэн кэпсииллэр училище билиҥҥи педагогтара.
Быйыл “30 сылга – 30 үтүө дьыаларын” ааҕан-суоттаан отчуоттаатылар. Хас биирдиилэрэ бэйэлэрин үлэлэригэр ситиһиилэрин кэпсээтилэр. Кинилэртэн Н.Н. Тихонова Антоновка орто оскуолатын начаалынай кылааһын учуутала “Алын кылаастарга оҕону чинчийэр үлэҕэ сыһыарыы”, И.В. Николаева Үөһээ Бүлүү орто оскуолатын начаалынай кылааһын учуутала “3-с кылааска Бунеев тиһигинэн нуучча тылын үөрэтии”, М.А. Мальцева Бороҕон орто оскуолатын начаалынай кылааһын учуутала СӨ үөрэҕириитин туйгуна “Саха тылыгар интерективнай дьарык”, С.М. Спиридонова Боотулу орто оскуолатын начаалынай кылааһын учуутала СӨ үөрэҕириитин туйгуна “ФГОС чэрчитинэн начаалынай кылаас учууталын үлэтэ”, И.И. Данилова Мииринэй Таас үрэҕин дьыссаатын иитээччитэ “Оскуолаҕа бэлэмниир бөлөххө оонньуулаах дьарыктар” тиэмэлэргэ аһаҕас уруоктары биэрдилэр, учуутал быһыытынан сиппиттэри-хоппуттарын көрдөрдүлэр.
Мантан да атын тэрээһин өргө диэри салҕанан барда. Көрсүһүү кэмигэр «Училище-колледж 100 сааһын туолар үбүлүөйүгэр көрсүһүөхпүт», -диэн эттилэр уонна “Уопут атастаһабыт” диэн методическай босуобуйа оҥорон аҕалбыттарын билиһиннэрдилэр.
