Ааһан эрэр сылга Чочу нэһилиэгин киирии аартыгар биир дьикти, ураты пааматынньык турбута. Нэһилиэк бэлиэтэ буолбут доисторическай кыыл оҥоһугун «Саха сирин киэн туттуута» өрөспүүбүлүкэтээҕи куонкурус «Норуот маастара» номинациятын кыайыылааҕа Николай Степанов чочуйбута. Онон маастар айар аартыгар бизон айаатаата.


Чочу нэһилиэгин баһылыга Петр Догоюсов үчүгэй майгылаах кыыл  көмүскүүр, араҥаччылыыр суолталаах диэн уонна былыр бу сиргэ бизон төбөтүн уҥуоҕа булуллубут историческай чахчытын үйэтитэр сыалтан пааматынньык оҥорторорго быһаарыммыта. Николай Степанов маастардаан туппут үтүө санаалаах кыыла нэһилиэккэ киириигэ турар.

— Урукку сылларга Бүлүү куоратын тупсарыыга кыраһыабай көстүүлээх дьиэлэри, тус-туһунан сахалыы оһуордаах, ойуулаах-мандардаах олбуордары уонна араас миэбэллэри оҥорор этим. Ону барытын түмэн оҥорон, дьоҥҥо сүбэ-ама биэрэн көмөлөһөр инниттэн 2016 сыллаахха «Бичик» кинигэ кыһатыгар «Дьиэ тутуута» диэн альбом-кинигэбин таһаарбытым, — диэн кэпсиир Николай Николаевич.

Кини өссө саха сытыы быһаҕын, дьүрүһүйэр тыастаах хомуһун оҥорон, улуус, өрөспүүбүлүкэ Үрүҥ тунах ыһыахтарыгар туруоруллар араас быыстапкаларга кыттан, бириистээх миэстэлэргэ тиксэрин билэбит. Онтон 2014 сыллаахха Аляскаҕа ыытыллыбыт муус оҥоһуктар куонкурустарыгар кыттан, аан дойду чөмпүйүөнүн үрдүк аатын ылбыта. 2015 сыллаахха Кытайга доҕордоһуу бэлиэтин быһыытынан саха сэргэтин туруоран, «Россия уонна Кытай култууратын уонна доҕордоһуутун бөҕөргөтүү иһин» диэн КНР Бочуотунай бэлиэтинэн наҕараадаламмыта.

— Кэнники сылларга цеменинэн пааматынньыктары, бюстары оҥорор буоллум. Ол курдук Дьокуускайга – Алгысчыт, дойдубар Балаҕаччыга – оччуттар диэн пааматынньыктаах уонна кэрэ көстүүлээх фонтаннаах «Үлэ килбиэнин скверин», Үгүлээккэ – Ийэ пааматынньыгын, Кыргыдайга – Саха хорсун снайпера Дмитрий Алексеевич Гуляев бюһун уонна аатырбыт олоҥхоһут Семен Николаевич Каратаев – Ырыа Дыгыйар пааматынньыгын, Бүлүү куоратыгар Олоҥхо дьиэтин тиэргэнигэр — киэн туттар олоҥхоһуппут Василий Осипович Каратаев пааматынньыгын, Хаҕыҥҥа сылгыһыт пааматынньыгын оҥорон туруортаатым. Дьонум-сэргэм сөбүлээбиттэриттэн өссө кынаттанар курдукпун, тугу эрэ айыах-тутуох санаам өссө күүһүрэргэ дылы буолар, — диэн бүччүм санаатын этэр Николай Степанов.

Айар киһи хаһан баҕарар инникигэ былааннаах, ураты суоллаах-иистээх көрүүлээх буолар. Ол сиэринэн Николай Николаевич эмиэ кэлэр сылга хомуска, быһахха, пааматынньыкка улахан сакаастары оҥоруохтаах. Итиэннэ үрүҥ көмүһүнэн сахалыы маллары оҥорон, Бүлүүм улууһун аатыттан быыстапкаларга кыттыам этэ диэн инники былааныттан билиһиннэрэр.

Ааптар: Николай ФЕДОРОВ

0
0
comments powered by HyperComments