Бүлүү улууһун уонна Тоҕус нэһилиэгин бочуоттаах олохтооҕо Николай Николаевич Волков бирииһигэр көҥүл тустууга оҕолор ортолоругар өрөспүүбүлүкэтээҕи турнир буолла. Кини — РФ үтүөлээх тренерэ, педагогическай наука кандидата, Саха сиригэр көҥүл тустуу Федерациятын төрүттээбит, онно бастакы бэрэссэдээтэлинэн үлэлээбит, Д.П. Коркин аатынан государственнай бириэмийэ лауреата. Тэрээһин «Эрчим» спортивнай саалатыгар ыытылынна.
Бүлүүгэ саха тустуутун төрүттэспит Николай Волков аатыгар өрөспүүбүлүкэтээҕи турнир ыытылынна. Бу күрэхтэһиигэ Дьокуускайтан, Үөһээ Бүлүү, Бүлүү, Ньурба, Горнай уонна Эдьигээн улуустарыттан уопсайа 155 эдэр кэскиллээх тустууктар күөн көрүстүлэр. Оҕолор 14 ыйааһыҥҥа ким кыахтааҕын, күүстээҕин быһаарыстылар. Икки күннээх эрийсиилээх киирсиилэр кэннилэриттэн элбэх чөмпүйүөннэр, призердар ааттаннылар.
Эдьигээннэр айаннара уустук, бастаан самолетунан Дьокуускайга, онтон массыынанан Бүлүүгэ кэлэллэр. Ол да буоллар кинилэр Н.Н. Волков бирииһигэр куруутун кытталлар. Бу сырыыга тренердэрэ Н.Н. Филиппов түөрт оҕону аҕалбытыттан икки оҕото иккис бириистээх миэстэни ыллылар.
Күрэхтэһии кыайыылаахтарыгар уонна бириистээх миэстэни ылбыттарга анал дипломнар, уу харчынан бириистэр уонна сертификаттар туттарылыннылар. Күрэхтэһии тэрээһинэ, ыытыллыыта, судьуйалар үлэлэрэ олус үчүгэйдик барда. «Уйгу» кафе үлэһиттэрэ оҕолору итии чэйинэн, амтаннаах аһылыгынан тохтоло суох хааччыйдылар. Сүрүн бириистэри, өрүү буоларын курдук, Бүлүүтээҕи спорткомитет (бэрэссэдээтэл Г.С. Евсеев) туруорда.
Саха тустуутун аксакала Николай Волков сахалыы «Көҥүл тустуу» диэн ааттаах өрөспүүбүлүкэҕэ тустуу сайдыытын көрдөрөр элбэх сэдэх хаартыскалардаах, хроникальнай-документальнай кинигэтин дьон хото атыыласта.
Ааптар: Николай ФЕДОРОВ
