Бүлүүгэ оҕо иитиитигэр аҕа оруолун үрдэтэр туһунан кэпсэттилэр

Билиҥҥи кэмҥэ оҕону иитиигэ аҕа оруола хаһааҥҥытааҕар да ордук чорботуллан бэлиэтэнэр. Ол иһин 2019 сылга Бүлүү улууһугар ыытыллыахтаах педагогическай дьаарбаҥкаҕа аҕаларга аналлаах былаһааккалар үлэлэрин тэрийиигэ бэлэмнэнэллэр. Н.Г.Чернышевскай аатынан Бүлүүтээҕи педколледжка «Гендерная социализация: проблемы и современный взгляд» диэн тиэмэҕэ «төгүрүк остуол» ыытылынна.

Бүлүүлэр оҕо иитиитигэр аҕа оруолун үрдэтэллэр. Соторутааҕыта ол туһунан киэҥ ыҥырыылаах «төгүрүк остуол» буолла. Маннык кэпсэтиини тэрийээччилэринэн ХИФУ пединститута, Бүлүүтээҕи педколледж уонна Н.В. Корякина сэбиэдиссэйдээх Бүлүү куоратын «Чуораанчык» оҕо саада  буоллулар. «Төгүрүк остуол» үлэтигэр оскуолаҕа киириэн иннинээҕи саастаах оҕолор тэрилтэлэриттэн элбэх аҕалар, оройуон, куорат дьокутааттара, оҕо саадтарын салайааччылара, начаалынай кылаастар учууталлара көхтөөхтүк кытыннылар. Сүрүн дакылааты ХИФУ пединститутун преподавателэ, «СОНОР ЖИПТО» оонньуу федерациятын толорооччу дириэктэрэ Елена Дмитриевна Троева-Лугинова оҥордо.

Ол кэнниттэн Бүлүүтээҕи педколледж дириэктэрэ С.В. Иванов, И.Л. Кондаков аатынан Бүлүүтээҕи гимназия дириэктэрэ Д.К. Федотов, аҕалар түмсүүлэрин бэрэссэдээтэлин солбуйааччы Т.Т. Алексеев, культура управлениетын информационнай-методическай киинин сэбиэдиссэйэ Н.В. Додутов, «Аҕа бастыҥ холобура» өрөспүүбүлүкэтээҕи куонкурус кыайыылааҕа Н.Я. Николаев, төрөппүт Д.А. Чиряев уо.д.а. дириҥ ис хоһоонноох киэҥ кэпсэтиини ыыппыттарын «төгүрүк остуол» кыттыылаахтара улаханнык сэҥээрдилэр.

Итини сэргэ аҕалар оҕолорунаан оҥорбут үлэлэринэн туруоруллубут быыстапка дьон болҕомтотун тарта. «Бигэ туруктаах аҕа – дьиэ кэргэн тирэҕэ» диэн өрөспүүбүлүкэтээҕи куонкурус кыайыылаахтара – Бүлүү куоратын «Чуораанчык» оҕо саадын уонна Кэбээйи улууһун Мукучу нэһилиэгин «Кэнчээри» уһуйаанын хамаандалара үлэлэрин уопутуттан сиһилии кэпсээтилэр.

Аҕалар оҕону иитиигэ оруолларын өссө үрдэтэргэ, оҕо иитиитигэр кинилэр үтүө холобурдарын туһанарга, оҕо тэрилтэлэригэр аҕалар Сэбиэттэрин тэрийэргэ уо.д.а. олус наадалаах этиилэр киирдилэр.

Ааптар: Николай Федоров