Бүлүү улууһугар өрөспүүбүлүкэҕэ биир бастакынан көһө сылдьар медицинскэй массыына-комплекс кэллэ.


Алтынньы 9 күнүгэр доруобуйа харыстабылыгар «Доступная медицинская помощь населению» диэн федеральнай бырагыраамманан көһө сылдьар медицинскэй массыына-комплекс улуустааҕы киин балыыһаҕа туттарылынна. Үөрүүлээх түгэни киин балыыһа үҥкүүһүттэрэ сахалыы нарын үҥкүүнэн киэргэттилэр.


Поликлиника киэҥ-куоҥ тиэргэнигэр тэрээһин кыттыылаахтара саҥа мобильнай массыынаны астына көрдүлэр. Киин балыыһа кылаабынай бырааһа, оройуон Сэбиэтин депутата Егор Анатольевич Григорьев маннык кэпсээтэ:
— Аныгылыы толору оборудованиелаах маннык мобильнай комплекс-массыына сүүстэн аҕыйах киһилээх нэһилиэнньэлээх пууннарга медицинскэй көмөнү оҥорорго бэриллэр. Биһиги улууспутугар Сосновка, Староватово уонна Илбэҥэ нэһилиэгин Арыылаах учаастагын олохтоохторугар медицинскэй көмөнү оҥоруоҕа уонна бастакы сырыытын сэтинньиттэн саҕалыаҕа.


Мобильнай фельдшерскэй пуун массыыната Москваттан айаннаан  Бүлүү улууһугар өрөспүүбүлүкэҕэ биир бастакынан кэллэ. Туох баар докумуонун, лиссиэнсийэтин, сертификатын барытын аҕалан туттарбыттар уонна массыына иһинээҕи оборудованиетын туруоран биэрбиттэр. Суоппарынан билигин А. Попов үлэлиир. Хааччыллыытынан, оҥоһуутунан билиҥҥи  үйэ саамай сайдыылаах техниката буолар: суукканы быһа үлэлиир дизель-генератордаах,  акушерскай-гинекологическай набордаах, электрокардиографтаах, хаан анаалыһын оҥорор тэриллээх. Барыта компьютер программатынан үлэлиир, кондиционердаах, муостата уот күүһүнэн ититиллэр.

— Онон биһиги үөрүүбүт муҥура суох. Маннык үчүгэй медицинскэй комплекс-массыынаны биһиги балыыһабытыгар биир бастакынан биэрбиттэрин иһин доруобуйа харыстабылын миниистиригэр Михаил Егорович Охлопковка барҕа махталбытын тириэрдэбит, — диир Егор Анатольевич.

Ааптар: Николай Федоров, «Олох суола» хаһыат

0
0
comments powered by HyperComments