М.К. Аммосов аатынан ХИФУ Хоту дойду прикладной экологиятын чинчийэр института  Бүлүү бөлөх улуустарын экологическай туругун чинчийиини саҕалаата. Бу туһунан СИА иһитиннэрэр.


«26 киһилээх аҕыс этэрээт Аччыгый-Ботуобуйа, Бүлүү, Марха өрүстэргэ үлэлии сылдьаллар. Пандемияттан сылтаан үлэ былааннаммыт кэмиттэн арыый хойут саҕаланна. Ол эрэн туруоруллубут сорудаҕы ситиһэр санаалаахпыт. Сиргэ үлэ алтынньыга диэри барыа, ол кэннэ барыллаан түмүктэри кэлэр сыл саҕаланыытыгар биллэриэхпит», — диир эппиэттээх үлэһит, биологическай наука кандидата Петр Данилов.

Чинчийэр үлэ Бүлүү бөлөх улуустарын экологическай туругун уонна онно олорор нэһилиэнньэ доруобуйатын кэлимник чинчийэр сыаллаах ыытыллар.

Үлэ 2023 сылга диэри үс хайысханан барыа: “Бүлүү өрүс хочолорун уонна кини салааларын экосистематын туругун кэтээн көрүү”, “Бүлүү өрүс хочолоругар уонна кини салааларыгар олорор нэһилиэнньэ доруобуйатын туругун билиминэн бигэргэтэн сыаналааһын, доруобуйаларын чөлүгэр түһэриигэ анаммыт медико-социальнай кэлим тэрээһини оҥоруу”, “Бүлүү өрүһү уонна кини салааларын бата олорор нэһилиэнньэлээх пууннары уу атын источниктарынан хааччыйар кыаҕы үөрэтии”.

Бу сыалга барыта 138 мөл. солкуобай көрүллүө. Былырыын АЛРОСА 40 мөл солк көрбүтэ, быйыл — 41,4 мөл. солкуобайы тыырыаҕа.

Киэҥ хабааннаах үлэни СӨ Үүнэр көлүөнэҕэ тус сыаллаах пуондата иилээн-саҕалаан ыытар.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.