Бүлүү бөлөх олохтоохторун доруобуйаларын чинчийиэхтэрэ

Бүлүү бөлөх улуустарын экологическай туруктарын чинчийэр үлэ бастакы кэрдииһэ түмүктэммитин туһунан ааспыт нэдиэлэҕэ суруйан турабыт. Сиргэ үлэлэр атырдьах – алтынньы ыйдарга  ыытыллыбыттара. Ууттан, сиртэн анаалыска боруобалар ылыллыбыттара, промышленность баар сирдэрин чинчийбиттэрэ.


Дьон доруобуйатын чинчийэр, үөрэтэр үлэ коронавирус пандемиятынан сыҕарыйан ХИФУ Мэдиссиинискэй институтун биирдиилээн үлэһиттэрэ Бүлүү бөлөх улуустарынан бу ыйтан айанныахтара.

Билигин сиргэ ыытыллыбыт үлэ түмүгүнэн «Сахагеоинформ» уонна Ирбэт тоҥу үөрэтэр институт Бүлүү бөлөх улуустарын айылҕатын туһунан урут бэчээттэммит үлэлэрин хомуйуу, саҥа түмүктэри кытары тэҥнээһин, экспертэр этиилэрин учуоттаан эбии-сабыы үлэтэ барар. Мииринэй улууһун Сүлдьүкээригэр чинчийии үлэтэ барда.

Санатабыт, Бүлүү бөлөх улуустарын экологическай туруктарын уонна олохтоох нэһилиэнньэ доруобуйатын кэлимник чинчийиигэ 138,0 мөл. солкуобай көрүллүбүтэ. Ааспыт сыл бүтүүтэ АЛРОСА 40 мөл солк.үлэ бастакы түһүмэҕэр көрбүтэ. Быйыл научнай-чинчийэр үлэҕэ 41,4 мөл. солкуобайы ыытара былааннанар.

This post was published on 27.10.2020 15:01 15:01