Бүгүн Бэрдьигэстээххэ улуустааҕы гимназия спортивнай саалата соһуччу ааспыт үйэ дыбарыаһыгар кубулуйан, литературнай бал ыытылынна. Улуу нуучча норуотун поэта Федор Тютчев олоҕор, айар үлэтигэр ананна.
Литературнай бал оҕолор нуучча литературатыгар, билиигэ тардыһалларыгар, кэрэни кэрэхсии, тутта-хапта үөрэнэллэригэр улахан суолталаах. Бу күн улуус оскуолаларын үөрэнээччилэрин, учууталларын икки ардыларыгар бальнай үҥкүүгэ, хоһоон ааҕыытыгар, Федор Иванович уонна атын нуучча поэттарын хоһооннорунан романстары толорууга, викторинаҕа күрэстэстилэр.
Литературнай бал муҥутуур кыайыылаахтара — Савва Тарасов аатынан Өрт орто оскуолата. Романстары толорууга — Сэмэн Данилов аатынан Бэрдьигэстээх орто оскуолатын үөрэнээччитэ Алик Петров. Федор Тютчев олоҕор, айар үлэтигэр аналлаах викторинаҕа — Афанасий Осипов аатынан Бэрдьигэстээх орто оскуолатын хамаандата. Бальнай үҥкүүгэ — гимназия үөрэнээччилэрэ.
Ааптар: Күннэй Алексеева.
This post was published on 27.10.2018 17:08 17:08