Бу туһунан биһиэхэ балыыһа пресс-сэкирэтээрэ Зоя Игнатьева кылаабынай быраас Борис Андреевтыын кэпсэтиититтэн кылгастык билиһиннэрдэ:

 Борис Витальевич, маннык эпэрээссийэ дьоһун суолтата тугуй?

— Сис тоноҕоһоҕун икки ардыларынааҕы диискэ ис тэһэҕэһин (грыжатын) лазернай декомпрессия ньыматынан эпэрээссийэлээһин элбэх үтүө өрүттэрдээх: ыарыыта суох оҥоһуллар, эпэрээссийэлэнэр киһи сааһыттан тутулуга суох, организмҥа буортуну оҥорор куттал суох, уопсай норкуос оҥоһуллубат, ыарыһах түргэнник үтүөрэрэ мэктиэлэнэр уонна балыыһаҕа уһуннук сыппат.

— Биир күннээҕи хирургия?

— Оннук. Бу эпэрээссийэ 80 бырыһыаҥҥа диэри үчүгэй клиническэй түмүктэри биэрэр.

“Биир күннээҕи хирургия” бырагырааманан оҥоһуллар эпэрээссийэлэр син биир балыыһа усулуобуйатыгар оҥоһуллар эпэрээссийэлэр. Ол гынан баран, ыарыһаҕы эпэрээссийэлэммит күнүгэр эбэтэр аҕыйах күнүнэн таһаарыахха сөп.

Үлэ үөрүйэҕэ көрдөрөрүнэн, хирургия орооһууларын аҥаардарын кэриэтин итинник усулуобуйаҕа оҥоруохха сөп диэн”, — хирурдар этэллэр. Биир күннээх хирургияны эмтэнээччилэр уонна кинилэр дьиэ кэргэттэрэ биһирииллэр уонна өйүүллэр. Тоҕо диэтэххэ, эпэрээссийэ ыарыһах балыыһаҕа киирээтин кытары аҕыйах чааһынан оҥоһуллар уонна кини сарсыныгар дьиэтигэр тахсыан сөп. Ол кэнниттэн, быраас ыарыһахха дьиэтигэр тиийэн туругун бэрэбиэркэлиир эбэтэр эпэрээссийэлэммит киһи олорор сиринэн (бырапыыскатынан) бэйэтин хируругар кэлэр.

— Оччоҕо Эһигини өссө биир кыайыыгытынан эҕэрдэлиэххэ сөп буоллаҕа?

— Бастатан туран, биһиги нейрохирурдарбытын. Лазернай хирургия – кэлэр кэскилбит технологията!

Надежда ЕГОРОВА, «Саха сирэ» хаһыат, edersaas.ru

0
0
comments powered by HyperComments