29 Кулун тутар 29.03
  • -14°
  • $ 92,26
  • 99,71

«Азия оҕолорун» уота Сунтаарга

12:28, 20 июня 2016
Текст:
Читайте нас на
Яндекс Новости
ЯДВ

Бу күннэргэ Сунтаар улууһугар норуоттар икки ардыларынааҕы VI «Азия оҕолоро» спортивнай оонньууларын уота кэллэ. Бу уот кулун тутар 29 күнүттэн Киһилээх хайаларыгар уматыллан, Саха сирин улуустарынан 35 тыһ. тахса км айаннаан, от ыйын 6 күнүгэр Дьокуускайга тиийиэхтээх. 100 күнтэн 81 күнүн быраҕан Сунтаар сиригэр-уотугар кэллэ.


Сэлии муоһун курдук оҥоһуулаах, Саха сирин куораттарын, улуустарын гербэлэ ойуулаах факел сүүрүүтүн Дмитрий Горохов салайан сылдьар. Кинини кытары Дьокуускайтан экстремал-альпинист Анна Яковлева, Дьааҥыттан хотугу улуустар бастыӨ марафонецтара Христофор Чукров бааллар.

Ыаллыы сытар Миирнэй оройуонуттан Черная үрэххэ утары көрсөн, арыаллаһан аҕаллылар. Бу эстафетаны улуус баһылыгын социальнай уонна имиджевай политикаҕа солбуйааччы У.Д. Попова салайан сырытта. Кириэстээх, Тойбохой, Аллыҥа нэһилиэктэригэр «Азия оҕолоро» оонньуу уотун үөрүүлээх быһыыга-майгыга көрсүү буолла. Ыалдьыттары кымыһынан, алаадьынан айах тутан, ырыа, үҥкүү бэлэхтээн көрүстүлэр. Факелы тула туран хаартыскаҕа түстүлэр.

Эрдэттэн былааннаммытынан, Сунтаарга, Элгээйигэ сынньанан, хонон-өрөөн ааһыахтаахтар. Анаабыт курдук, сынньалаҥнар Сунтаарбыт Үрүҥ Тунах Ыһыаҕын күннэригэр түбэспит, Элгээйи нэһилиэгин ыһыаҕар эмиэ сылдьан ааһаллар эбит. Ыһыах бастакы күнүгэр ипподромҥа ат сүүрдүүтэ буолуон иннинэ «Азия оҕолорун» уоту улуус баһылыга А.В. Григорьев, Сунтаар нэһилиэгин баһылыга Э.Е. Филиппов көрүстүлэр.

Норуоттар икки ардыларынааҕы VI «Азия оҕолоро» спортивнай оонньууларын уотун Сунтаар улууһун устун улуус киэн туттар спорсменнара тутан Ньурба улууһугар атаарыахтара.

Следите за самым важным и интересным в Telegram-канале и WhatsApp-группе ЯСИА