VI — с «Азия оҕолоро» норуоттар икки ардыларынааҕы оонньуу уотун арыаллааччылар Томпо улууһугар Теплай Ключ сэлиэнньэтин кэнниттэн Хаандыга бөһүөлэгэр, Кэскил уонна Мэҥэ Алдан сэлиэнньэлэригэр ыалдьыттаатылар.
Хаандыга бөһүөлэгэр уоту VI — с «Азия оҕолоро» оонньууга көҥүл тустууга кыттыахтаах Женя Огородникова, Сайыына Малышева уонна улуус спортсменнара арыаллаатылар. Улуус баһылыга Георгий Герасимов эҕэрдэ тылы эттэ. Стадиоҥҥа элбэх киһи мустан үөрүүлээх түгэҥҥэ кытынна. Эдэр ыччат уонна оҕолор ыллаатылар-туойдулар, үҥкүүлээтилэр.
Улуус баһылыга Георгий Герасимов уонна райсовет председателэ Илья Шадрин уоту арыаллааччылары кытта туспа көрүстүлэр. Георгий Евгеньевич кинигэлэри бэлэхтээтэ.
Томпо оройуонун баһылыгын соцбоппуруостарга солб. Петр Новгородов баһылыктаах делегация салгыы Кэскилгэ тиийдибит. Ыалдьыттары сахалыы табык ньиргиэрин тыаһынан көрүстүлэр, ыалдьыттары арыылаах алаадьынан, дьэдьэн барыанньатынан уонна уохтаах кымыһынан айах туттулар. Тойук дуорайда, ырыа ылланна, хомоҕой хоһоон этилиннэ. VI — с «Азия оҕолоро» оонньууга мас тардыһыыга кыттыахтаах Игорь Фролкин томполор үтүө үгэстэрин салҕаан хайаан да кыайыам диэн тылын биэрдэ.
Алданы туораан баран Дмитрий Горохов, Анна Яковлева уонна Христофор Чукоров Мэҥэ Алдан баһылыгар Юрий Комиссаровка туттардылар. Онтон факел эдэр спортсменнар эстафеталаан оскуола иннигэр мустубут дьоҥҥо тиийдибит. Алгыс этилиннэ, аал уот арыылаах саламаатынан аһатылынна. Уоту Саха сиригэр биллэр агротехнологическай оскуола директорыгар Александр Николаевка туттардылар. Петр Новгородов «Азия оҕолорун» уотун арыаллааччы Анна Яковлеваҕа уонна Христофор Чукоровка томполор бэйэбит оҥорбут, биир дойдулаахпыт, Саха сирин 2-с президенэ Вячеслав Штыров туһунан кинигэлэри, Дмитрий Гороховка олорбут сирин – Тополинай туһунан кинигэни бэлэхтээтэ. Дмитрий Горохов Томпо оройуонун уонна Мэҥэ Алдан олохтоохторугар истиҥ көрсүһүүлэрин, Петр Новгородовка уонна улуус хаһыатын корреспондена Евдокия Неустроеваҕа 4 хонук улуус устун арыаллаабыттарын иһин махталын биллэрдэ.
Ханна да тиийдэрбит улахан дьон да, оҕолор да уоту уонна арыаллааччылары кытта дуоһуйуохтарыгар дылы хаартыскаҕа түстүлэр.
Мэҥэ Алдан — Томпо оройуонун бүтэһик нэһилиэнньэлээх пууна. Уоту муус устар 26 күнүгэр Таатта оройуонун дьонугар туттардылар.
