Художественнай гимнастика күрэхтэһиитигэр 30,07 баалы ылан Сибиирдээҕи федеральнай уокурук спортсменкалара кыайыы көтөллөннүлэр. Иккискэ Казахстан гимнасткалара таҕыстылар. Үһүс бириистээх миэстэни Москва уонна Саха сирин хамаандалара үллэһиннилэр.
Күрэхтэһии кылаабынай судьуйата Татьяна Грибкова икки күннээх эриһиигэ мээчиктээх уонна ленталаах толорууну СФУо спортсменкалара эрэ «кылбардык» толорбуттарын бэлиэтиир.
Онтон бэҕэһээҥҥи фавориттар, Казахстан гимнасткалара, бүгүн 14,383 баалы эбиннилэр. Онон уопсай зачекка 29,833 баалланнылар уонна «үрүҥ көмүс» мэтээлгэ тигистилэр.
Саранскайга спортивнай оскуолалар Бүтүн Россиятааҕы сайыҥҥы II спартакиадаларыгар икки «кыһыл» уонна «үрүҥ көмүс» мэтээллэммит Москва бэрэстэбиитэллэрэ бу сырыыга үһүс буоллулар.
Саха сирин гимнасткалара лиэнтэлээх тахсыыларыгар 14,8 баалланан, уопсай көрдөрүүгэ 29,517 тэҥнэстэ.
«Пьедесталга тахсыбыттар бары техника өттүнэн бэлэмнэрэ бэртээхэй. Сибиирдээҕи федеральнай уокурук кыргыттара ньүөмэрдэрин биир да сыысхала суох толордулар. Саха сирин спортсменкалара бэҕэһээ мээчиктээх тахсыылара чаҕылхай этэ. Онтон казахстаннар, москвалар сыыһалаахтар-халтылаахтар», — диир Татьяна Грибкова.
Маныаха СФУо художественнай гимнастикаҕа хамаандатын тренерэ Оксана Курганская: «Илин былдьаһааччыларбытын – казахстаннары уонна күүстээх гимнасткалардаах москвалары куоттубут. Кыргыттарым көбүөрдэрэ табылынна, улахан сыыһалара суох», — диэтэ уонна кини спортсменкалара быыстала суох дьарыктаналларын тоһоҕолоон эттэ.
Гимнастикаҕа бээтинсэҕэ 4 кэмпилиэк мэтээл иһин күрэстэһии буолар.
