Бүгүҥҥү күн туругунан, уопсай зачекка Саха сирин 1 №-дээх сүүмэрдэммит хамаандата 12 кыһыл көмүс мэтээллээх. Итинтэн алтатын паралимпиецтар уонна сурдлимпиецтар ыллылар.
Дьокуускайга «Азия оҕолоро» спортивнай Оонньуу чэрчитинэн, паралимпийскай уонна сурдлимпийскай күрэхтэһиилэр бырагыраамаларын түмүктэринэн пресс-конференция буолла. Саха сирин спортсменнара бастакы күннэргэ 19 мэтээли ылбыттарыттан алтата үрдүк суолталаахтар.
СӨ Паралимпийскай комитет регионнааҕы салаатын бэрэссэдээтэлэ Николай Дегтярев оҕолору ситиһиилэринэн эҕэрдэлээтэ. Пауэрлифтиҥҥа күрэхтэһии кылаабынай судьуйата Сергей Трусов өрөспүүбүлүкэҕэ паралимпийскай уонна сурдлимпийскай көрүҥнэргэ күрэхтэһиилэр тиһиктээхтик ыытыллалларын үрдүктүк сыаналаабытын бэлиэтээтэ. Манна даҕатан эттэххэ, пауэрлифтиҥҥа күрэхтэһиигэ «кыһыл көмүс» мэтээли регион сүүмэрдэммит хамаандатыгар Карина Попова уонна Надежда Кылосова аҕаллылар.
От ыйын 9 күнүгэр сурдлимпийскай бырагырааманан көҥүл тустууга күрэхтэһии ыытыллыбыта. Онно Саха сирин хамаандата Россия түөрт регионун уонна Казахстан утары киирсибитэ. Күрэхтэһии түмүгүнэн Николай Васильев, Евгений Мохначевскай, Максим Бердугин, Тимофей Алексеев, Афанасий Петров, Алексей Васильев, Андрей Винокуров уонна Алексей Кондратьев кыһыл, үрүҥ көмүс уонна боруонса мэтээллэри ылбыттара.
Спортивнай Оонньуулар кэннилэриттэн спортсменнар тута Москва анныгар Раменскайга оҕолор Бүтүн Россиятааҕы сайыҥҥы II спартакиадаларыгар (ПОДА) дуобакка, спринҥэ, чэпчэки атлетикаҕа уонна спортивнай ориентированиеҕа кыттан кэллилэр. Онно буолбут күрэхтэһии түмүгэр, «Азия оҕолоро» VI спортивнай Оонньууларга пауэрлифтиҥҥа чемпионнаабыт Карина Попова спортивнай ориентированиеҕа уонна сприҥҥэ үс кыһыл көмүс мэтээли, 200 миэтэрэҕэ сүүрүүгэ үрүҥ көмүһү итиэннэ дартска боруонсаны ылла. «Азия оҕолорун» пауэрлифтиҥҥа боруонса призера Алина Куприянова спортивнай ориентированиеҕа уонна сприҥҥэ иккис миэстэни, дуобакка үсүһү ылла. Паралимпийка Маргарита Левенцева чэпчэки атлетикаҕа «боруонсаны», Мичил Марков 400 миэтэрэҕэ сүүрүүгэ үрүҥ көмүс мэтээли ыллылар.
«Азия оҕолоро» норуоттар икки ардыларынааҕы VI спортивнай оонньуулар чэрчилэринэн ыытыллыбыт паралимпийскай уонна сурдлимпийскай программалар түмүктэннилэр. Бүгүҥҥү күн туругунан Саха сирин 1 №-дээх хамаандата уопсайа 60 наҕарааданы ылбытыттан, 12-тэ кыһыл көмүс мэтээл.
