Бу күннэргэ улуустарга “Азия оҕолоро” норуоттар икки ардыларынааҕы оонньуу түмүктэрин таһаараллар, кыайыылаахтары чиэстииллэр. Өймөкөөн улууһуттан Сергей Афонин, Любомир Ашеин Оонньууга кыттан кыһыл көмүс мэтээл кэттилэр.
Оонньууга мас тардыһыытыгар Сергей Афонин, көҥүл тустууга Любомир Ашеин кыттан, кыһыл көмүс мэтээллэри ылан, төрөөбүт Өймөкөөннөрүн дорҕоонноохтук ааттаттылар.
Уус-Ньаратааҕы Игорь Хоменко аатынан орто оскуола 9-с кылааһын үөрэнээччитин Сергей Афонины Чурапчытааҕы спорт интститутун бүтэрбит Тимур Ядреев дьарыктыыр. Любомир Ашеин 1-кы кылаастан 7-кэ диэри дьарыктаабыт тренерэ —Владимир Саввинов. Кэрэхсэбиллээҕэ баар, “Өймөкөөн Колодкотынан” сүрэхтэммит Сергей Афонин ини-бии Евгений уонна Василий Сицевтэр туйахтарын хатаран, төрөөбүт Өймөкөөнүн салгыы сураҕырдар былааннаах. «Тренербин Тимур Витальевиһы кытта аны “Манчаары” күрэхтэһиитигэр турунуулаахтык ылсыам», — диэн санаатын үллэстэр быыппастар былчыҥнаах эдэр спортсмен.
Оттон Любомир Ашеин дойдутугар сынньана түһэн баран, атырдьах ыйыттан Чурапчы Мындаҕаайытын спортивнай лааҕырыгар дьарыктана айанныаҕа. Кини аны Арассыыйа оҕолорго көҥүл тустууга чөмпүйэнээтигэр кыттарга бэлэмнэнэр. Любомир айанын өрүү үбүнэн өйүүр эбэтэ Елизавета Ашеина сиэнэ күрэхтэспит куораттарын барытын билэр. «Оҕом эрэлбин түһэн биэрбэтэ. Кини дойдутугар кыайыы көтөллөнөн кэлэрин туһугар, сиэммин өрүү өйүү туруом», – диэн үөрэ-көтө кэпсиир дьоллоох эбээ.
