Ыам ыйын 19 күнүгэрАан дойдутааҕы «Азия оҕолорун» VI спортивнай оонньууларын уота Өлөөн оройуонугар көтөр аалынан кэллэ. Факелы СӨ биллэр альпинистката Анна Яковлева аҕалла.
Аан дойдутааҕы «Азия оҕолорун» VI спортивнай оонньууларын уотун үөрүүлээхтик көрсүү сиэрэ-туома Өлөөн аэропордугар тэриллэн ыытылынна. Мустубут дьону, спортивнай хамсааһын көхтөөх кыттыылаахтарын, эдэр спортсменнары улуус баһылыгын социальнай боппуруостарга солбуйааччы Людмила Александрова эҕэрдэлээтэ.
Салгыы Уоту арыаллаан кэлбит СӨ биллэр альпинистката Анна Яковлева факелы Өлөөн эбэҥки национальнай оройуонун спортивнай хамсааһын бэрэстэбиитэллэригэр үөрүүлээхтик туттарар. Спортивнай марш доҕуһуолунан уоттаах факелы оройуон биллэр спортсмена, оҕо спортивнай оскуолатын тренерэ Валерий Колтовской илиитигэр өрө тутан, Өлөөн сэлиэнньэтин эргийэр уон этаптаах сүүрүүнү 10 эдэр спортсмен кыттыылаах саҕалыыр. Маннык чиэс оройуон спортивнай хамсааһынын биллэр спортсменнарыгар Станислав Степановка – хапсаҕайга Аан дойду чемпионугар; Вячеслав Петровка – гиирэ спордугар Саха Өрөспүүбүлүкэтин чемпионугар; Афанасий Филипповка – гиревой спортка Саха Өрөспүүбүлүкэтин призерыгар; Вениамин Васильевка – кинг-боксинга Саха Өрөспүүбүлүкэтин чемпионугар; Марианна Винокуроваҕа – гиревой спортка уонна ох саанан ытыыга Саха Өрөспүүбүлүкэтин чемпионкатыгар, Андрей Андреевка – спорт бэтэрээнигэр; Анжела Николаеваҕа – мини-футболга Саха Өрөспүүбүлүкэтин күүстээх спортсменкатыгар бэриллэр.
Уот бочуоттаах эргиири оҥорон баран, Өлөөн өрүс үрдүнээҕи «Юбилейнай» сквергэ аҕалыллан Саха Өрөспүүбүлүкэтин бочуоттаах тренерин, дойдуну аатырдыбыт, олимпийскай чемпион Роман Дмитриев, дойду чемпиона буолбут Гаврил Дмитриев, бырааттыы Григорий уонна Петр Христофоровтары иитэн таһаарбыт үтүөлээх тренер Иннокентий Илларионов илиитигэр үөрүүлээхтик туттарыллар. Салгыы «Азия оҕолорун» VI спортивнай оонньууларын Уотун Өлөөҥҥө үөрүүлээхтик уматыы бырааба Аан дойдутааҕы «Азия оҕолорун» IV спортивнай оонньууларын чемпионугар Степан Ивановка бэриллэр.
Кыттыыны ыллылар улуус дьаһалтатын баһылыга Александр Иванов, Саха Өрөспүүбүлүкэтин судаарыстыбаннай мунньаҕын Ил Түмэн депутата Елена Голомарева.
