«Азия оҕолоро» VI спортивнай оонньууларын Уота ыам ыйын 25 күнүгэр Анаабыр национальнай (долган-эбэҥки) улууһугар көтөр аалынан айаннаан кэллэ. Факелы СР экстремальнай сүүрүүгэ, Үөһээ-Дьааҥы Бочуоттаах олохтооҕо,«Азия оҕолорун» аан дойдутааҕы спортивнай оонньууларын эстафетатын салайааччыта Дмитрий Горохов аҕалла.


Уоту көрсүү сиэрэ-туома Сааскылаах аэропордугар тэриллэн ыытылынна. Ыалдьыттары уохтаах кымыһынан айах тутан, арыылаах алаадьынан күндүлээн көрүстүлэр. Факелы Дмитрий Николаевич аэропортан нэһилиэк кыраныыссатын пааматынньыгар, улуус баһылыгын бастакы солбуйааччыта Валерий Зедгенидзевка туттарда. Мустубут дьону, спортивнай хамсааһын көхтөөх кыттыылаахтарын, спортсменнары бу бэлиэ түгэнинэн Валерий Валериевич эҕэрдэлээтэ уонна Уоту спортивнай эстафета кыттааччытыгар, боксаҕа РФ спордун маастарыгар, Сааскылаах нэһилиэгин баһылыгар Евгений Лаптевка туттарда.

Спортивнай марш доҕуһуолунан уоттаах факелы Евгений Ильич улуус биллэр спортсменыгар , оҕо спортивнай оскуолатын боксаҕа тренеригэр Егор Соловьевка тиксэрэр. Егор Дмитриевич факелы илиитигэр өрө тутан, Сааскылааҕы эргийэр аҕыс этаптаах сүүрүүнү 8 спортсмен кыттыылаах саҕалыыр. Маннык чиэс улуус спортивнай хамсааһынын биллэр спортсменнарыгар Попов Алексейга, «Алмаас» ЭКК спортсаалатын тренажернай саалын инструкторыгар, боксаҕа РФ спорт маастарыгар; Федотов Терентийга, улуустааҕы гимназия 10 кылааһын үөрэнээччитигэр, боксаҕа ХИФУ аһаҕас турнирын чемпионугар, Спиридонов Евгенийга, аэропорт үлэһитигэр, боксаҕа республиканскай күрэхтэһиилэр кыайыылаахтарыгар, Матвеев Алексейга, гимназия суоппарыгар, бильярд республиканскай турнирдар хаста төгүллээх кыайыылааҕар, Николаев Михаилга, боксаҕа IV-с “Азия оҕолоро” Аан дойдутааҕы спортивнай оонньуу кыттыылааҕар, боксаҕа республиканскай турнирдар кыайыылааҕар, -Борисов Г.Г., Анаабырдааҕы РЭС начальнигар, көҥүл тустууга Иркутскай уобалас уонна Иркутскай куорат 1972-1977 с.с. 5 төгүллээх чемпионугар тигистэ.

Уот бочуоттаах эргиири оҥорон баран, «Алмаас» этно-культурнай киин таһыгар бэлиэ түгэни өрөгөйдүүр тэрээһинигэр аҕалылынна. Эбэҥкилии үгэһинэн «Чыпчыпкаан» ачаах маһынан бырааһынньык түһүлгэтигэр киирбит спортсменнары  дьон-сэргэ уруйдуу-айхаллыы көрүстэ. Дмитрий Николаевич олохтоохтору бу үөрүүлээх бэлиэ түгэнинэн, VI-с «Азия оҕолоро» аан дойдутааҕы спортивнай оонньуу Уота Анаабыр улууһугар кэлбитинэн эҕэрдэлээтэ:

Уот диэн Аан дойду бары норуоттарыгар сүдү суолталаах символ буолар. Бу Уот элбэх улууһу кэрийэн эһиэхэ кэллэ. Оонньууларга диэри өссө да 42 хонук хаалла, салгыы 17 улууһунан от ыйын 5 күнүгэр Дьокуускай куоракка «Азия оҕолоро» спортивнай оонньуутун аһыллыытыгар тиийиэхтээх. Эһиги алгыс тылгыт, эстафета уотугар кыттыыгыт спортсменнарбытыгар күүс-көмө буолар. Республика хамаандата кыайыынан кынаттанарыгар уруй, айхал!

0
0
comments powered by HyperComments