«Азия оҕолоро» Оонньуу пресс-киинигэр саҥа посоллары аныыр туһунан официальнай иһитиннэрии буолла. Афиныга уонна Атлантаҕа буолбут олимпийскай Оонньуулар кыттыылаахтара Альгасара Рукайа уонна Нашида Язни, кинилэри сэргэ олимпийскай призер Ибрагим Абазид саҥа посолларынан ааттаннылар.
Билигин Оонньуу посолларынан аан дойдуттан 20-тэн тахса бастыҥ спортсмен уонна олимпийскай чемпион буолаллар. Альгасара Рукайа (Бахрейн), Нашида Язни (Мальдивы) уонна Ибрагим Абазид (Сирия) – чэпчэки атлетика көрүҥүнэн дьарыктаналлар, кинилэр норуоттар икки ардыларынааҕы таһымҥа үрдүк көрдөрүүлээхтэр.
Оонньуу норуоттар икки ардыларынааҕы кэмитиэтин сүрүн сэкирэтээрэ Сергей Хатылыков этэринэн, «Азия оҕолоро» Оонньуу посола буолартан өссө ким да аккаастана илик. «Биһиги Оонньуубут миссията уонна соруктартара олимпийскайы кытта дьүөрэлии, спортсменнар ону өйдүүллэр, ол иһин үөрүүнэн сөбүлэһэллэр», — диэтэ кини.
Нашида Янзи 1996 сыллаахха Атлантаҕа буолбут Олимпийскай Оонньуу кыттыылааҕа, спортивнай оскуола тэрийээччитэ уонна дириэктэрэ СИА-ҕа санаатын маннык үллэһиннэ: «Мин күүспүн-кыахпын барытын уурарга кыһаллыам. Оҕолору көҕүлүөххэ наада. Кинилэргэ бу Оонньуу Олимпиадаҕа бастакы хардыы буоларын быһаарыахтаахпыт. «Азия оҕолоругар» аан бастакы кыттыым. Тэрээһинэ олус үчүгэй! Барыларыгар ситиһиини уонна кыайыыны!»
Посоллар бэйэлэрин олимпийскай уопуттарын тарҕатыахтара, «Азия оҕолоро» Оонньуу туһунан спортсменнарга эрэ буолбакка, атын оҕолорго эмиэ кэпсиэхтэрэ. Посол өссө биир соругунан кини олимпийскай сыаннаһы өрө тутуута буолар. Кинилэр Оонньуу элбэх кыттааччылаах буоларыгар уонна норуоттар икки ардыларынааҕы аренаҕа билиниллэригэр үлэлиэхтээхтэр.
