29 Кулун тутар 29.03
  • -13°
  • $ 92,26
  • 99,71

"Азия оҕолоро" Оонньуу кыайыылаахтара Рио Олимпиадатыгар бириистээх миэстэлэри ыллылар

15:44, 12 августа 2016
Текст:
Читайте нас на
Яндекс Новости
ЯДВ

«Азия оҕолоро» норуоттар икки ардыларынааҕы оонньуу үгүс спортсмен улахан спортка тэбинэн тахсалларыгар олугу охсор. Ити туһунан Саха сирин салалтата да, экспердэр да элбэхтэ этэллэрэ. Россия атлеттара Антон Чупков уонна Туяна Дашидоржиева Дьокуускайга урукку өттүгэр кыһыл көмүс мэтээллэри ылбыттара, билигин Рио Олимпиадатыгар бириистээх миэстэлэргэ тигистилэр.

Туяна Дашидоржиева 2012 сыллаахха «Азия оҕолоро» норуоттар икки ардыларынааҕы оонньууга Сибиир федеральнай уокуругун сүүмэрдэммит хамаандатын састаабыгар киирэн кыттыбыта уонна кыһыл көмүс мэтээли ылбыта. Риоҕа оҕунан ытыыга Россия хамаандатыгар үрүҥ көмүс мэтээли аҕалла.

Антон Чупков эмиэ «Азия оҕолоро» норуоттар икки ардыларынааҕы оонньууга икки кыһыл көмүс мэтээли Москва хамаандатыгар аҕалбыта. Бразилия олимпиадатыгар 200 м. харбааһыҥҥа боруонса мэтээли ылла.

«Азия оҕолоро» мин спортивнай суолбар ураты улахан миэстэни ылар. Онно күрэстэһии муҥутуур улахан этэ. Эдэр спортсменнар уопуттарыгар сүрүн суолталаах күрэхтэһиилэр этилэр», — диэн Антон Чупков Sovsport.ru суруналыыстарыгар бэлиэтиир.

«Азия оҕолоро» бэһис оонньуу харбааһыҥҥа биэс төгүллээх чөпмүйүөнэ Дарья Устинова Олимпиадаҕа кытта сылдьар. 200 м. уһуҥҥа атырдьах ыйын 13 күнүгэр киирсиэҕэ.

«Азия оҕолоро» — миэхэ ураты улахан суолталаах. Дьокуускайга олус ситиһиилээхтик кыттыбытым. Араас уһуҥҥа барытыгар кэриэтэ кыайыы көтөллөммүтүм. Күрэхтэһии күүһү-күдэҕи эппитэ чуолкай. Онно бэйэм кыахпар бигэ эрэл үөскээбитэ», — диир Устинова.

Кыргызстан хамаандатыттан «Азия оҕолоро» оонньуу харбааһыҥҥа чөмпүйүөнэ Денис Петрашов кыттар. Атырдьах ыйын 19 күнүгэр 2004 сыллаахха Оонньууга кыһыл көмүс мэтээли кэппит Виктор Лебедев Рио көбүөрүгэр тахсар.

Следите за самым важным и интересным в Telegram-канале и WhatsApp-группе ЯСИА