«Азия оҕолоро» VI Норуоттар икки ардыларынааҕы спортивнай оонньуу арыллыытыгар Россия бырабыыталыстыбатын бэрэссэдээтэлэ Дмитрий Медведев, вице-премьер Юрий Трутнев, РФ Национальнай олимпийскай кэмитиэтин президенэ Александр Жуков кыттыыны ылаллар.
«Оонньуу ис хоһооно кэҥиир, ыалдьыттар да статустара үрдүүр. Быйыл Россия бырабыыталыстыбатын бэрэссэдээтэлэ Дмитрий Медведев, вице-премьер Юрий Трутнев, РФ Национальнай олимпийскай кэмитиэтин президенэ Александр Жуков кыттыыны ылаллара күүтүллэр. Билигин өрөспүүбүлүкэҕэ Монголия үөрэххэ уонна спортка миниистирэ баар. Чуолаан кинилэр аныгыскы 2020 сылга буолуохтаах Оонньууну ыытарга этиилээхтэр», — диэн Егор Борисов от ыйын 5 күнүгэр «Саха» НКИК ханаалыгар быһа эфиргэ эттэ.
Санатар эбит буоллахха, Саха сирэ дойду президенэ Владимир Путин кэлиитин күүппүтэ. Кини Бүтүн Россиятааҕы норуот фронун форумугар кыттыахтаах этэ.
«Мин балаһыанньаны атыннык эргитэн өйдөөбөккүтүгэр ыҥырыам этэ. Президент от ыйын саҥатыгар ыытыллыахтаах элбэх тэрээһини көһөрүүгэ быһаарыы ылыммыта. Холобур, мин от ыйын 5 күнүгэр Госсовет президиумун мунньаҕар Алтаай кыраайыгар кыттыахтаах этим. Судаарыстыба баһылыга үлэтэ графигынан барар, ардыгар уларытыылар киириэхтэрин сөп», — диэтэ Борисов.
