Саха сирин хамаандатын спортсмена Иван Аржаков сүүрээри сырыттаҕына, күрэстэһээччилэртэн биирдэстэрэ шиповканан атаҕын үктээбит. Итинник түгэҥҥэ СӨ сүүмэрдэммит хамаандата маннык быһыы алҕас тахсыбытын эбэтэр соруйан оҥоһуу буолуон сөбүн быһаарсыбат.


«Соруйан үктээһин эбитэ дуу, алҕас дуу. Арааһа, ол үктээбит спортсмен аһара долгуйан хаалбыт буолуон сөп», — диэн Саха сирин сүүмэрдэммит хамаандатын тренерэ Василий Алексеев санаатын этэр.

Шиповка спортсмен атаҕын таҥаһын алдьаппыт уонна ылгын чыҥыйын үктээбит. Уолчаан оннук эчэйиини тулуйан туран, сырсааччыларын барыларын кэннигэр хааллартаан, мэһэйдэрдээх 2000 миэтэрэни бастакынан түмүктээтэ. Бириэмэтэ 6 мүнүүтэ 22,31 сөкүүндэ. Онон Иван Аржаков кыһыл көмүс мэтээли ылла уонна пьедестал чыпчаалыгар таҕыста.

Сүүрүү кэнниттэн спортсмен бу туһунан быһаарса да барбата. Ол оннугар хара маҥнайгыттан үс бастакы иһигэр киирэргэ сыал-сорук туруоруммутун этэр. «Миэхэ, тус бэйэбэр, дистанцияҕа саамай ыарахан уулаах умуһаҕы ааһыы этэ», — диир чемпион.

Күрэхтэһии иккис күнүгэр аны Кытай уонна Саудовскай Аравия спортсменнара эчэйбиттэр. Кинилэри билигин быраастар кэтээн көрөллөр.

sa-kopiya[1]

0
0
comments powered by HyperComments