«Азия оҕолоро» оонньуулар норуоттар икки ардыларынааҕы кэмитиэт бэрэссэдээтэлэ Владимир Максимов уонна Кемеровскай уобалас губернатора Сергей Цивилев 2023 сылга II кыһыҥҥы оонньуулары ыытар туһунан Сөбүлэҥҥэ илии баттаатылар.
Докумуоҥҥа сөп түбэһиннэрэн, оонньуулары Кузбасс түөрт куората көрсүөҕэ: Кемерово, Новокузнецк, Таштагол уонна Междуреченск. Хас биирдиилэригэр анаммыт күрэхтэһиилэр ыытыллыахтара, СИА-ҕа «Азия оҕолоро» кэмитиэт пресс-сулууспата иһитиннэрдэ.
Бырагыраамаҕа сэттэ көрүҥ киирэр — биатлон, хайыһар, хаҥкы (шорт-трек), хоккей, сноуборд, хайа хайыһара уонна хаҥкынан «фигурное катание». Кемеровскай уобалас бэрэстэбиитэллэрэ бырагыраамаҕа эбии хайыһарынан трамплинтан ыстаныыны, керлинг уонна фристайл көрүҥнэри киллэриэхтэрин баҕалаахтарын эттилэр.
Кузбасска килиимэт сөптөөх, кыһына хаардаах, спортивнай эбийиэктэргэ суоллаах, гостиница элбэх, аһыыр да сир баар. Онон улахан тэрээһини ыытар кыахтаахтар.
Ахсынньы 15 — 18 күннэригэр «Азия оҕолоро» иниспиэксийэлиир хамыыһыйата эбийиэктэри көрдө.
Бастакы кыһыҥҥы оонньуулар 2019 сыллаахха Сахалин уобалаһыгар ыытыллыбыттара.
