Атырдьах ыйын 1 күнүттэн Англияҕа, Турцияҕа, Танзанияҕа барыахха сөп буолуо. Бу туһунан дойду премьера Михаил Мишустин миниистирдэри кытары мунньаҕар эттэ диэн, Парламентская газета суруйар.
Онуоха-маныаха диэри Великобритания (Лондон), Турция (Анкара, Стамбул) уонна Танзания (Занзибар) куораттарыгар барыахха сөп. Ыйыллыбыт дойдулар эпидемиологическай туруктара аматынан быһаарыллар. Сыыйа атырдьах ыйын 10 күнүттэн эбии Турция Анталья, Бодрум, Даламан куораттара аһыллыахтара.
Тырааныспар миниистирэ Евгений Дитрих эбии 30 дойдуну кытары халлаан суолунан айаны саҥардыы үлэтэ бара турарын этэр.
Ол эрэн Госдума дьокутаата, уруккута дойду санитарнай бырааһа Геннадий Онищенко быйыл арассыыйа олохтоохторун омук дойдутугар сынньанартан туттуналларыгар ыҥырар. Ордук Турцияҕа сынньанартан. Турция доруобуйа харыстабылын таһымын өйдөөн туран, бу сылга айантан туттуммут ордук диир дьокутаат.
Михаил Мишустин от ыйын 24 күнүгэр Арассыыйаҕа туризмҥа уонна көстүүнэй биисинэһигэр ураты бэрээдэк киирэрин туһунан эттэ. Анал уураах быһыытынан туроператордар айан тохтотуллубут буоллаҕына туристка харчытын толору төннөрүөхтээхтэр эбэтэр кэлэр сыл бүтүөр диэри атын айаны тэрийиэхтээхтэр. Бу курдук ньыма көстүүнэйдэргэ эмиэ сыһыаннаан үлэлиэ.
