Быйыл тыа хаһаайыстыбатын дьоҕус биэрэпиһин ыытыахтара. Бу туһунан Сахастат эппиэттээх үлэһитэ Кыдана Егорова «Якутия 24» ханаалга кэпсээтэ.
Тыа хаһаайыстыбатын микробиэрэпиһэ биэс сылга биирдэ ыытыллар. Биэрэпиһи сири бас билээччи физическэй, юридическэй сирэйдэр, о.э. тыа хаһаайыстыбатын тэрилтэлэрэ, крестьянскай, фермерскай хаһаайыстыбалар, биирдиилээн урбаанньыттар, кэтэх хаһаайыстыбалар уонна коммерческайа суох табаарыстыбалар толоруохтара. Биэрэпиһи атырдьах ыйыгар ыытыахтара.
2016 сыллаахха ыытыллыбыт бүтүн Арассыыйатааҕы тыа хаһаайыстыбатын биэрэпиһигэр Саха сиригэр барыта 620 тыа хаһаайыстыбатын тэрилтэтэ, үс тыһыынча кэриҥэ кэтэх хаһаайыстыба итиэннэ 800 тыа хаһаайыстыбатынан дьарыктанар урбаанньыт кыттыбыт.
Быйылгы микробиэрэпискэ тыа сиригэр олорор эрэ кэтэх хаһаайыстыбалары суруйуохтара. Ол курдук биэрэпис 18 улууһу, Дьокуускай- Хатас, Тулагы-Киллэм, Марха уо.д.а. нэһилиэктэри хабыа.
Хаһаайыстыбалар биэрэпиһи бэйэлэрэ толорон туттарыахтара оттон кэтэх хаһаайыстыбалары боломуочуйалаахтар суруйуохтара.
Коммерческайа суох (садоводческай, огородническай, дачнай) холбоһуктарга биэрэпиһи бэрэссэдээтэлтэн ыйытык көмөтүнэн суруйуохтара. Холбоһукка хас учаастак киирэрин, уопсай сир иэнэ төһөтүн, хас учаастак туһанылларын чуолкайдыахтара.
Дьоҕус биэрэпис түмүгэ 2022 төрдүс кыбаарталыгар биллиэ. Билигин бэлэмнэнии үлэтэ барар.
