Сарсын Астана куоракка Сергей Потапов Горькай аатынан нуучча театрыгар туруорбут «Уһуктуу» спектаклын премьератын көрө пьеса автора Софья Баранова айанныыр.
Испэктээкил премьерата ыам ыйын 14, 15 күннэригэр буолуоҕа. Онтон режиссер уонна пьеса автора ыам ыйын 17-25 күннэригэр Новосибирскайга ыытыллар «Новосибирский транзит» фестивальга кыттыыны ылыахтара. Ити фестивальга режиссер Сергей Потапов икки испэктээкилинэн кыттыыны ылыаҕа: Эстония театрыгар олохтоох драматург 30-с сылларга суруйбут айымньытынан туруорбут «Оборотень» (2015с.) испэктээкилинэн уонна Хакассия «Чичиген» театрыгар туруорбут «Иирбит Ньукууһунан» (2016с.).
Былырыыҥҥы уонна быйылгы сыллар Сергей Потапов Сибиир, урукку Союз республикалара Казахстан, Эстония театрдарыгар ыҥырыллан таһаарыылаахтык үлэлээтэ. Онон биһиги, сахалар, биллэн турар, киэн туттабыт. Саха театрын аатыттан Сергей Потаповы, Софья Иннокентьевнаны премьераларынан эҕэрдэ ыытабыт уонна фестиваль түһүлгэтигэр дьоһун ситиһиилэри.
