Хас да ырыа тылын ааптара, Түүлээх нэһилиэгиттэн төрүттээх Мария Афанасьевна Алексеева – Решетникова – Арылы Дуйдаах диэн ааттарынан биллэр. 2012 сылтан норуот бэйиэтэ И.В. Мигалкин салайар СӨ суруйааччыларын Сойууһун чилиэнэ. Идэтинэн үрдүк категориялаах быраас. Дьоруойдары туойар ураты аналлаах.
Арылы Дуйдаах Медицинэ Национальнай киинигэр Клиническэй киин тэрийэр-миэтэдьиичэскэй салаатын сэбиэдиссэйэ. Аҕата Афанасий Кононович Алексеев учуутал, кыраайы үөрэтээччи, РФ суруналыыстарын Сойууһун чилиэнэ, элбэх кинигэ ааптара.
«Былырыын сайын улуустааҕы сэрии, тыыл, үлэ бэтэрээннэрин Сүбэтин салайааччыта И.С.Калининскай көрдөһүүтүнэн Сэбиэскэй Сойуус Дьоруойун В.Д.Лонгинов туһунан ырыа тылын суруйбутум. Матыыбын композитор Алексей Калининскай-Луҥха Өлөксөй айбыта. Күһүн СӨ үтүөлээх артыыһа Александр Емельянов Дьокуускайга Дьоруой Лонгинов искибиэрин арыйыыга сахалыы, нууччалыы толорбута. Нууччалыы тылбааһын биир идэлээҕим, хоһоонньут, Бээрийэттэн төрүттээх Валентина Комиссарова оҥорбута. Ырыабыт ол курдук табыллан хаалан, Иван Семенович «аны Үлэ Дьоруойун хоһуйарыҥ буоллар» диэн тыл көтөхпүтэ«, — диэн кэпсээтэ кини.
Онон Мария Афанасьевна быйыл тохсунньу 2 күнүгэр Михаил Николаевич Готовцев 75 сааһын туолбутун туһунан истээт даҕаны, ол киэһэ хоһоонун биир тыынынан суруйар. Матыыба эмиэ Луҥха Өлөксөйгө тиксэн, дьиҥ сахалыы тыыннаах ырыа айыллар. Наталья Руфова уонна Василий Новоприезжай утуу-субуу толорон, ырыа куйаар ситиминэн тарҕанна.
«Бу күннэргэ ырыаттан сылтаан элбэх кэпсэтии таҕыста. Саха дьоно Михаил Николаевиһы хайдах курдук сөбүлүүллэрин, ытыктыылларын өссө төгүл итэҕэйдим. Ийэм Мария Яковлевна Алексеева Герой Егоров аатынан сопхуоска ветбырааһынан үлэлээбит буолан, Үлэ Дьоруойун кытта сирэй көрсүбэтэрбин даҕаны, оҕо эрдэхпиттэн ытыктыы улааппытым. Ол да иһин хоһоон түргэнник төрөөбүтэ буолуо. Саҥа ырыа киниэхэ үйэлээх бэлэх буоллун уонна пиэрмэ ыарахан үлэтигэр бэриниилээхтик сыраласпыт ийэлэрбитин, аҕаларбытын, эбэлэрбитин, эһэлэрбитин санаттын. Дьиҥнээх үлэ дьоруойдара хоһулла турдуннар«, — диэн санаатын үллэһиннэ Решетникова.
Мария айар үлэттэн поэзияны ордорор. Элбэх бириэмэни устуоруйаны үөрэтиигэ, суруйууга аныыр.
Сиһилии суруналыыс Светлана Сивцева «Мүрү саһарҕата» хаһыат инстаграм-сирэйигэр суруйбутун манан киирэн ааҕыҥ muru.sahargata
