Норуоттар икки ардыларынааҕы «Россия сегодня» агентствоҕа Егор Борисов биэрбит интервьютун кэмигэр эппиттэринэн, «ТНТ» телеханаал Саха сиригэр саҥа кэмиэдьийэни устар баҕалаах.
ТНТ генеральнай продюсерын солбуйааччы Евгений Никишов Егор Борисов бу бырайыагы өйүүрүгэр көрдөстө. Сабаҕалааһын быһыытынан, «Биригээдэ» киинэни устубут Алексей Сидоров режиссер буолуохтаах. Сүрүн оруолга Михаил Пореченков оонньуохтаах.
Киинэҕэ ойууланар быһыы-майгы тыйыс хоту усулуобуйаҕа буоларынан, киинэни Саха сиригэр устар туһунан толкуйдаабыттар. СИА суруналыыһа Евгений Никишовы кытта бу бырайыак тула сиһилии кэпсэттэ.
Евгений этэринэн, устар бөлөх муус устарга Саха сиригэр кэлиэҕэ. Киинэни быһа холуйан биир ый устата устуохтара. Евгений Никишов «Реальные пацаны», «Зайцев + 1», «Деффчонки» сериаллары устарга үлэлэспитэ, онон үчүгэй хаачыстыбалаах көрдөөх-күлүүлээх сериал буолан тахсарын күүтэллэр.
Егор Борисов киинэни устарга, айарга-тутарга бары усулуобуйа тэриллиэҕин туһунан эрэннэрдэ.
