Эбээн-Бытантай улууһа ордук ыраах тайаан сытар буолан, айан суола тыын суолталаах. «Арктика суоллара» генеральнай дириэктэрин солбуйааччы Сергей Афанасьевич Сивцев иһитиннэрбитинэн, сэтинньи 15 күнүгэр 10 туонна уйуктаах массыыналарга кыһыҥҥы суол арыллыахтаах. «Биир, икки күн хойутаан, баҕар эрдэлээн суолбутун арыйар былааннаахпыт», — диэтэ кини.
Сергей Сивцев иһитиннэрбитинэн, Эбээн-Бытантай сиригэр-уотугар «Арктика суоллара» ааспыт саас Мачахха К-700, «Агромаш» тыраахтардары хаалларбыт буолан, бэс ыйыгар бу тиэхиньикэлэр суолу оҥорууга үлэлээннэр, кыраныыссаҕа тиийбиттэр. Ол эрэн, ойуур баһаардара мэһэйдээннэр төннүбүттэр.
Алтынньы ыйга Уаз-массыына уонна биир тыраахтыыр туорааннар, Тээҥки үөһээ өттүгэр, о.э. Саккырыыр диэки өттүн суолун көннөрөн кэлбиттэр. Бу күһүн Саккырыыртан Бытантайга диэри суолу тэҥнээһиҥҥэ, хаар ыраастааһыныгар, мууһу халыҥатыыга аукцион ыыппыттар. Бастакы аукциоҥҥа ким да кыттыбатах. Ааспыт нэдиэлэтээҕигэ олохтоох уол Ананий Юмшанов кыттан, кыайыылаах таҕыста.
«Юмшанов номнуо ааспыт өрөбүллэргэ «Урал» массыынанан Бытантайга тиийэн, хаарын ыраастаан туораатым, баһаарга охтубут мастары ыраастаатым диэн иһитиннэрдэ. Ол эбэтэр, билиҥҥи кэмҥэ «Улахан Шамантан» Бытантайга диэри суол оҥоһулла илик. Бу күннэргэ Баатаҕайдааҕы салаа үлэһиттэрэ Мачахтан тыраахтырдары туораттылар. Онон, мууһу халыҥатар үлэлэри ыытан, суол оҥоруутугар киирэн, Бытантайга диэри тиийиэхпит. Сэтинньи 15 күнүгэр 10 туонна уйуктаах массыыналарга кыһыҥҥы суолу арыйахпыт диэн былаанныыбыт. Биир, икки күн хойутаан эбэтэр эрдэлээн буолуон сөп«, — диэтэ Сергей Сивцев.
— Эбээн-Бытантайга эһиги тэрилтэҕит салаата хаһан арыллыах курдугуй?
— Улууска суолунан дьарыктанар ДРСУ диэн тэрилтэ баара. Ол тэрилтэ сирин докумуонун оҥоһуута ыытыллар. Билигин да ситэ илик. Улуус баһылыга Гаврил Гаврильевичтыын бу боппуруоска ыкса ситимнээхтик үлэлиибит. Бу күһүн «Арктика суоллара» хаһаайыстыбаннай чааһын салайааччыта Николай Захаров кэлэн бааза тэриллиэхтээх сирин, дьиэтин көрөн-истэн, кээмэйдээн, туох ханнык матырыйаал наада буоларын барытын үөрэтэн билсибитэ. Билиҥҥи кэмҥэ матырыйаал ылыытыгар куонкурус биллэрдибит. Бу кыһын туох баар матырыйаалы миэстэтигэр тиэрдиэхтээхпит. Онтон сайын бааза начаалынньыгын, механиктары үлэҕэ ылан гараж о.д. өрөмүөнүн бэйэбит күүспүтүнэн ыытыахпыт. Онон, барыта этэҥҥэ былаан быһыытынан бардаҕына, 2020 сыл сайыныгар Эбээн Бытантайга «Арктика суоллара» салаата арыллыаҕа. 2020 сыл саҥата Саккырыырга барыахтаах тиэхиньикэлэргэ аукционнар ыытыллан, атыылаһыллан миэстэтигэр тиэрдиэхтээхпит.
Ааптар: Яна РОЖИНА, Эбээн-Бытантай улууһа
