Саха сирин баһылыга Егор Борисов видеоконференция режиминэн селекторнай мунньаҕы ыытта. Манна Арктика, хоту улуустарыгар күн-дьыл туругуттан сылтаан үөскээбит кыһалҕаны дьүүлэстилэр.
Егор Борисов үөскээбит кыһалҕаны туоратыыга анаан үбү-харчыны бюджеккэ көрөр туһунан бырабыыталыстыбаҕа сорудахтаата.
Абый уонна Орто Халыма улуустарын олохтоохторо күн-дьыл бөрүкүтэ суох туругар тэптэрэн эдэр сүөһүлэрин өлөрөргө уонна этин туттарарга күһэллэллэр. Маныаха сыһыаннаан Ил Дархан бастыкы вице-премьергэ–тыа хаһаайыстыбатын уонна ас-үөл бэлиитикэтин миниистиригэр Петр Алексеевка туһаайан сөптөөх механизымы оҥорорго эттэ.
«Биир сыл буолан баран харчы оннугар убаһаны босхо ылыахтаахтар. Атастаһыы сыаната тэҥ буолуохтаах», — диэтэ Егор Борисов. Ону таһынан бу улуустартан эти тэрээһиннээхтик атыылаһыахтара.
Миниистирдэр уонна биэдэмистибэлэр салайааччылара Арктика улуустарыгар тиийэн кыһалҕаны миэстэтигэр быһаарыахтара. Егор Борисов бу улуустар суолларыгар-иистэригэр ураты болҕомто уурулларыгар эттэ. Тырааныспар миниистирэ хоту улуустарынан ааһар кыһыҥҥы суолларга «Суол хаартатын» оҥоруохтаахтар. Онно суолу оҥоруу үлэтин кээмэйэ, туттуллар тиэхиньикэ ахсаана элбиирэ аахсыллыахтаах. Бу улуустарга эбии аһылыгы, бензины тиэрдэр бөртөлүөттэр графиктара бигэргэниэхтээх.
Ону таһынан өрөспүүбүлүкэ баһылыга муниципалитеттарга 2-3 «Бураны» буолбакка, хас нэһилиэк аайы биирдии “Бураны” биэрэргэ эттэ. Ону таһынан Абыйга тыраахтардары тиэрдэр соругу туруорда.
«Кыһалҕаны быһаарыыга ылсан үлэлиэхпит», —диэтэ Борисов.
Арктика уонна хоту улуустары аһынан-үөлүнэн, социальнай суолталаах табаарынан, эминэн-томунан уонна уматыгынан хааччыйыыны бырабыыталыстыба хонтуруоллууругар эттэ.
Мунньахха Абый, Аллайыаха, Анаабыр, Үөһээ Дьааҥы, Аллараа Халыма, Өймөкөөн, Эбээн-Бытантаай оройуоннарын баһылыктара, Орто Халыма, Үөһээ Халыма, Муома, Усуйаана уонна Булуҥ баһылыктарын солуйааччылара кытыннылар.
