Кэлэр сылтан Саха сиригэр дьоҕус уонна орто бизнес бэрэстэбиитэллэрэ арктическай улуустарга таһаҕаһы тиэйиилэригэр ороскуоттарын сабыыга субсидия көрүллүөн сөп. Ол туһунан предпринимателлэр Форумнарыгар этилиннэ. Мунньах Дьокуускай куоракка ыытылынна.


Өрөспүүбүлүкэ тайаан сытар сирин иэнэ киэҥинэн, суол-иис суоҕунан, арктическай улуустарга таһаҕаһы тириэрдиигэ харгыстар бааллар.

«Арктика кытылынан тайаан сытар улуустар сайдыыларыгар биир кыһалҕаларынан сорох нэһилиэнньэлээх пууннар бэйэ-бэйэлэриттэн олус тэйиччилэрэ, тырааныспар сырыытыгар суол-иис суоҕа буолар. Ол иһин предпринимателлэр сүрүн үлэлэринэн таһаҕаһы кэмиттэн-кэмигэр тириэрдиигэ дьулуһаллар«, — диэн Арктика сайдыытыгар уонна СӨ Хотугу норуоттарын дьыалаларыгар миниистири солбуйааччы Сергей Неустроев эттэ.

Үөһэ этиллибити учуоттаан, республика предпринимательствоҕа, атыыга-эргиэҥҥэ уонна туризмҥа министерствота Арктика оройуоннарыгар бородууктаны тириэрдэр предпринимателлэр айаҥҥа-суолга көрсөр ороскуоттарын сабыыга субсидияны киллэрэр туһунан этиннилэр. «Бу көҕүлээһини толорор уонна сокуону таһаарар былаастар өйүүллэригэр этиилээхпит«, — диэтэ предпринимательство миниистирин солбуйааччыта Максим Прокопьев.

Кини маннык субсидияны көрүү арктическай улуустар сайдыыларын былааныгар кэккэ уларыйыылары киллэриэ диэн санаатын эбэн эттэ. Бастатан туран, бу бородуукта сыаната чэпчииригэр, иккиһинэн, предпринимателлэр тириэрдэр бородуукталарын арааһа элбииригэр тириэрдиэ. Үсүһүнэн, бородуукта хаачыстыбата мэктиэлээх уонна кэмигэр тириэрдиллэр буолар.

0
0
comments powered by HyperComments