“Арассыыйа лидердэрэ” куонкуруска сайаапкалары ылыы алтынньы 24 күнүгэр түмүктэниэҕэ

“Арассыыйа лидердэрэ” салайааччылар иккис куонкурустарыгар кыттарга сайаапкалары ылыы салҕанар. Сайаапкалары лидерыроссии.рф сайтка ылаллар.

Куонкурус иккис сезонугар 55 диэри саастаах, биэс сылтан итэҕэһэ суох салайар уопуттаах дьон кытталлара ирдэнэр. Куонкурус 35 саастарыттан эдэр кыттааччылара салайар үлэҕэ икки сыл үлэлээбит уопуттаах буолаллара да сөп.

Санатан эттэххэ, куонкуруска регистрацияланыы лидерыроссии.рф сайтыгар алтынньы 24 күнэ бүтүөр диэри ыытыллар. Кыайыылаахтар тус настаабынньыктаныахтара – дойду бастыҥ салайааччыларынан буолар экспердэр ахсааннара быйыл 90 киһиэхэ диэри  элбээтэ.

Финалга тахсыбыт 300 киһи 1-дии мөлүйүөн солкуобайы ылыахтара уонна бу үбү бэйэлэрэ талбыт бырагыраамаларынан идэлэрин таһымын үрдэтиигэ туһаныахтара.

Кыайыылаахтар ортолоруттан РАНХиГС “салайар каадырдары сайыннарыы бырагырааматын” анал кыттааччылара талыллыахтара.

Тиэстээһини ааспыт куонкурус хас биирдии кыттааччытыгар бастыҥ HR-исписэлиистэр сайдыы тус былаанын биэриэхтэрэ. Кыайыылаахтар бириистэри уонна хампаанньалартан – куонкурус партнердарыттан  этиилэри тутуохтара.

Арассыыйа кэлэр кэскилин түстүүр лидердэр түмсүүлэригэр киирэр кыаххытын мүлчү тутумаҥ!