Алданнар Арассыыйа күнүгэр бэлисипиэти тэбиигэ күрэхтэспиттэрин туһунан СИА суруйар. Болҕомтону тардар тэрээһиҥҥэ чөл олоҕу өйөөччүлэр, бэлисипиэти тэбиинэн дьарыктанааччылар үөрүүнэн мустубуттар.
Бастатан туран, үөрүүлээх тэрээһин ыалдьыттарын куорат баһылыга Александр Бугай итиитик-истиҥник эҕэрдэлээбит. Сомоҕолоһуу улахан күүс буоларын тоһоҕолоон туран, үлэҕэ, үөрэххэ, күрэскэ бу курдук түмсүүлээх, көхтөөх буоланнар, барыны кыайа-хото туталларыгар махтаммыт. Күрэхтэһиигэ кыттаары тыҥаан турар спортсменнарга Алдан ГИБДД начаалынньыга Михаил Парфенов сүбэ-ама, ыйыы-кэрдии биэрбит. Ол кэннэ 152 спортсмен күрэскэ туруммут.
Икки маршрутунан ыытыллыбыт бастакы күрэхтэһиигэ 300 курдук киһи кыттыбыт. Онно куорат устун барар суолга оскуола үөрэнээччилэрэ кытары холоммуттар. Кэлин күрэхтэһии биир уопсай маршруттаммыт. Быйылгы суол уһуна 40 км тиийбит. Спортсменнар куорат иһинээҕи суолунан уонна «Лена» федеральнай суолунан тэбэллэр. Колоннаны оптуобус уонна «суһал көмө» арыаллыыллар. Маннык сэргэх тэрээһини Алданнааҕы «Газпром Трансгаз Томск» ХЭУо уонна улуус дьаһалтата тэрийэллэр.
