Сыл аайы Араадьыйа күнүгэр Сэбиэскэй Сойуус Дьоруойа, биллиилээх араадьыйа суруналыыһа Николай Кондаков аатынан государственнай бириэмийэ «Саха» НКИХ бастыҥ үлэһиттэригэр дьоруой пааматынньыгын аттыгар үөрүүлээх быһыыга-майгыга туттарыллар.
СӨ Ил Дарханын уонна бырабыытылыстыбатын дьаһалтатын салайааччы Федор Борисов Аҕа дойду сэриитин кыттыылаахтарыгар, тыыл бэтэрээннэригэр, «Саха» НКИХ уонна сибээс үлэтин бэтэрээннэригэр Араадьыйа күнүнэн уонна Улуу Кыайыынан бэйэтин эҕэрдэтин тиэртэ.
—Иһитиннэрэр-биллэрэр эйгэ үлэһиттэрэ, эһиги уопсастыбаны былааһы кытта ситимниигит. Күннээҕи дьоһуннаах араас хайысхалаах дириҥ ис хоһоонноох айар үлэҕитинэн өрөспүүбүлүкэ социальнай-экономическай олоҕор сүҥкэн кылааккытын киллэрэҕит. Сэбиэскэй Сойуус Дьоруойа Николай Кондаков аатынан государственнай бириэмийэни туттарыы — бу эһиги тахсыылаах үлэҕит үрдүк сыанабыла, — диэн Федор Борисов анаан бэлиэтээн туран, телевидение дирекциятын документальнай бырагыраама редакциятын салайааччытыгар Дарья Ермолаеваҕа уонна телевидение дирекциятын телевизионнай производство сулууспатын режиссера Елена Эверстоваҕа «Бириэмэ кэрэһиттэрэ» («Хранители времени») дириҥ ис хоһоонноох биэриини бэлэмнээн оҥорбуттарын иһин суолталаах наҕарааданы туттарда.
СӨ Информационнай технологияларын уонна сибээс миниистирин солбуйааччы Чокуур Гаврильев Саха араадьыйата быйыл 88 сылын, аны икки сылынан 90 сылын үөрүүлээхтик бэлиэтиэҕин, оттон Саха телевидениетэ 55 сыла туолбутугар болҕомтону туһаайда уонна биир идэлээх кэллиэгэлэригэр суруналыыстарга уонна техническэй үлэһиттэргэ ситиһиилээх үлэни баҕарда.
«Саха» НКИХ генеральнай дириэктэрэ Нина Харитонова араадьыйа уонна телевидение бэтэрээннэрин, билигин айа-тута сылдьар үлэһиттэри Араадьыйа күнүнэн эҕэрдэлээтэ. Кини Сэбиэскэй Сойуус Дьоруойа Николай Кондаков төрөөбүт дойдутун Бүлүү улууһун Дьөппөн нэһилиэгин олохтоохторун, орто оскуолатын кытта сибээстэрин быспаттарын, араас тэрээһиннэри ыыталларын бэлиэтээтэ. Хампаанньа салайааччыта Дьөппөн орто оскуолатын 10 кылааһын үөрэнээччитигэр Валерий Жерготовка үгэс буолбут анал истипиэндьийэни туттарда.
Сэбиэскэй Сойуус Дьоруойа Николай Кондаков төрөөбүт нэһилиэгин олохтооҕо, «Саха» НКИХ истипиэндьийэтин хаһаайына Валерий Жерготов бэйэтин туһунан билиһиннэрдэ. Уол «Тэтим» үҥкүү ансаамбылыгар үҥкүүлүүр, спортсмен ааттааҕа, өссө кэрчик киинэ устар эбит. Онон истипиэндьийэни ылыахтаах киһи ылбыт!
Дьөппөн нэһилиэгин баһылыга Егор Степанов аны икки сылынан Сэбиэскэй Сойуус Дьоруойа Николай Кондаков 100 сааһын туоларын бэлиэтээтэ.
— Николай Алексеевич Кондаков 29 сыл биир тэрилтэҕэ үлэлээбитэ. Дьоруой 100 сааһын көрсө «Саха» Национальнай көрдөрөр-иһитиннэрэр хампаанньаҕа Сэбиэскэй Сойуус Дьоруойа Николай Кондаков аатын иҥэрэр туһунан бу күннэргэ Ил Дархаҥҥа Егор Борисовка анаан туруорустум, — диэн былаанын билиһиннэрдэ.
Араадьыйа күнүн «Саха» НКИХ сыл аайы бу курдук олус тэрээһиннээхтик ыытар, ытык кырдьаҕас бэтэрээннэрин анаан ыҥыран чиэстиир.
Араадьыйа күнүгэр кэлбит ытык кырдьаҕастар Бэчээт дьиэтигэр тиийэн, Аҕа дойду сэриитигэр Ийэ дойдуларын иһин олохторун толук биэрбит суруналыыс-буойуннары кэриэстиир мэҥэ өйдөбүнньүккэ сибэкки дьөрбөтүн уурдулар. Бу үөрүүлээх күҥҥэ хампаанньа ытык бэтэрээннэрэ анаан чиэстэннилэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.
