Антоновка уһуйааныгар уолаттарга туспа бөлөх арыйдылар

Ньурба Антоновкатыгар «Ромашка» уһуйаан иһинэн быйыл күһүҥҥүттэн гендернай бөлөх аһыллан, үлэтин саҕалаабыта. Бөлөххө уолаттар эрэ сылдьаллар, кинилэри Ньурба улууһугар соҕотох эр киһи иитээччи илдьэ сылдьар.


Антоновка нэһилиэгин «Ромашка» оҕо уһуйаана бүгүҥҥү күҥҥэ Ньурба улууһугар саамай улахан оҕо саада буолар. Уол оҕону туспа иитии сонун, сэргэх бырайыагын быйылгыттан саҕалаатылар.

Сэбиэдиссэй Егор Егорович Кириллин кэпссиринэн, Октябрьскай нэһилиэккэ уопсайа 138 оҕо уһуйаан уочаратыгар турарыттан быйыл икки бөлөҕү арыйан, 36 2013-14 сыллаах төрүөх оҕолору ылбыттар. 61 үлэһиттээх уһуйааҥҥа уопсайа 168 оҕо сылдьар.

Быйылгы үөрэх дьылыгар аны саас икки подготовка бөлөҕүттэн 40 оҕо бүтэрэн тахсыахтаах. Сылын аайы дьиэлэрин кыралаан өрөмүөннүүллэр. Эһиил сайын  акылаатын аныгы ирдэбилинэн бетонунан уларытыллыахтаах. Быйыл иккис корпуска толору хааччылыыны киллэрбиттэр.

Былырыыҥҥы үөрэх дьылын анаалыстаан көрүү түмүгэр саамай элбэх уоллаах биһиги буолбуппут. Ол курдук 2017-2018 үөрэх дьылыгар 78 уол сылдьар этэ. Уочараппытыгар даҕаны уол оҕо элбэх турар. Онон улуус дьаһалтата уонна улуустааҕы үөрэҕирии управлениета «Ромашка» уһуйааҥҥа уол оҕо бөлөҕүн арыйыахха диэн былааннаабыттара. Инньэ гынан былырыын буолбут Бүлүү бөлөх улуустарын Эр Дьонун форумугар «Уол оҕо — инники кэскилбит, Эр Киһи — эрэлбит» диэн бырайыак барыла оҥоһуллан, былааҥҥа киирбитэ. Бөлөҕү тэрийэрбитигэр саамай улахан күчүмэҕэйбитинэн эр киһи иитээччини булуу этэ, — диэн кэпсиир Егор Егорович.

Ити боппуруостарын улуус дьаһалтатыгар тиийэ көтөҕө сылдьыбыттар. Онтон бэйэбит бииргэ үлэлиир кэллиэгэлэрэ: «Мин кэргэним анал үөрэхтээх, иитэр эйгэҕэ уопуттаах», — диэн этии киллэрэн, Николай Семенович Николаевка таба тайаммыттар.

Уһуйаан бу күһүҥҥүттэн «Окрытие» диэн анал бырагыраамманан үлэлээн саҕалаата. Манна үс бөлөххө сылдьар уһуйаан бары оҕото сарсыарда кэлэн баран, бэйэтин баҕатынан ханнык Кииҥҥэ бүгүн барыан баҕарарын талар уонна онно дьарыктанар. Иитээччи көмөлөһөөччүлэрэ  (тьютердар) оҕолору талбыт Кииннэринэн илдьэн дьарыктарыгар көмөлөһөллөр. Хас биирдии Кииҥҥэ оҕо 30 мүнүүтэ дьарыктанар, онтон салгыы атыҥҥа барар.

-Бу маннык иитии ньыматын Сунтаарга туһаналлар. Онон былырыын анаан-минээн туох баар үлэһиттэрбитин илдьэ баран, үөрэнэн кэлбиппит, — диэн Егор Кириллин үлэлэрин-хамнастарын кэпсээтэ.

«Уоланнар» бөлөххө 18 оҕо сылдьар. Оторой-моторой уолаттар 3-4 саастаах буоланнар, бары сытыылар-хотуулар. Түөртүүрдээҕи аһылыктарын кэнниттэн кырачааннар атын хоско дьарыкка бардылар. Николай Семенович Николаев үлэтин-хамнаһын, оҕолорун туһунан маннык кэпсээтэ:

Мин бэйэм «социальнай педагог» идэлээхпин, бу иннинэ интернакка иитээччинэн үлэлээбитим. Уолаттарга эр киһи сыһыана ураты буолар диэн өйдөбүллээхпин. Кинилэр эр киһи иитээччини көрөллөрүгэр да сэргэх уонна ордук истэллэр. Бөлөхпүт аҥара аҥаардас ийэ оҕолоро, онтон аҥаарбыт толору дьиэ кэргэнтэн сылдьаллар, — диир кини.

Толору да дьиэ кэргэҥҥэ үксүгэр аҕа күн улахан аҥарын дьиэтигэр суох, үлэлии-хамсыы сылдьар буолар. Онон Николай Семенович аҕа, эр киһи оруолун уолаттары иитиигэ ситэрэн-хоторон биэрэр. Оҕолоро күннээҕи дьарыктарын, оонньуулларын таһынан бэйэтэ ыытар «Тутуу» уонна «Байанай» Кииннэргэ сылдьаллар.

Билигин биһиги алын бөлөх буолабыт. Аны үс сылынан уһуйааны бүтэрэн тахсыыларыгар уолаттарым эр киһи өттүттэн толору иитиилээх, оскуолаҕа бэлэмнээх буолан тахсыахтара диэн күүтэбин. Бастакы саҕалааһын баар, өссө үлэлээн иһиэхпит, — диир иитээччи.

Ааптар: Александра Варламова, «Ньурба — Огни Нюрбы» хаһыат

0
0