Тымныы полюһун кэрэ аҥардара аламаҕай майгыларынан, талба талааннарынан, тулуурдарынан, дьулуурдарынан биллэллэр. Кинилэр хотугу дойду кытаанах усулуобуйатыгар алаһа дьиэни тэринэн, оҕону-урууну үксэтэн, олоҕу салҕааччы, уйгуну түстээччи аатын дьоһуннук сүгэллэр. Олортон биирдэстэринэн Томтор нэһилиэгин олохтооҕо Анна Винокурова буолар.


Анна Ивановна оҕо сааһа, олоҕун улахан аҥара ыстааданы кытта сибээстээх. Кини төрөппүттэрэ Өймөкөөн улууһун удьуор табаһыттарыттан биирдэстэрэ этилэр. Анна Ивановна сэттэ оҕолоох дьиэ кэргэҥҥэ үһүс оҕонон күн сирин көрбүтэ.

Томтор орто оскуолатын бүтэрээт, “Оскуола – производство – үөрэх” девиһинэн комсомольскай путевканан ыстаадаҕа бостуугунан үлэлии тахсыбыта. Кинилэр ыстаадаларыгар  оччолорго 2 тыһыынча кэриҥэ табаны маныыллара. Эдэр кыыс ол сылдьан олоҕун аргыһын Алексей Гаврильевиһы көрсөн, ыал буолбута. Үс оҕоҕо күн сирин көрдөрбүттэрэ.

Анна Ивановна сүүтүктээх иннэтин илиититтэн араарбат иистэнньэҥ, норуотун национальнай таҥаһын тигэн киэҥ араҥаҕа таһаарар, бэйэтин уопутун биир интэриэстээхтэрин кытта үллэстэр.

– Ийэм Евдокия Николаевна иистэнэ, тирии имитэ олорорун кыра эрдэхпиттэн көрөн улааппытым, кини курдук араас дьэрэкээн таҥастары тигиэхпин баҕарарым. Аан бастаан бэйэбэр тиктибит маҥан этэрбэспин ийэм быһан биэрбитэ. Ол этэрбэспин, бастакы улахан ииһим буолан, иккистээн-үһүстээн көтүрэ-көтүрэ тикпитим, – диэн кэпсиир Анна Ивановна. – Тириини кыппалыырга, таҥастыырга, имитэргэ, тигэргэ барытыгар ийэбиттэн үөрэммитим.

Бу үлэҕэ саамай уустуга – тириини кыһыахтыыр уонна хатаран баран имитэр. Сарыы оҥорорбутугар тириитин тас өттүн кыппалыыбыт, онтон хатыччы хаппатын диэн ураһаҕа ыыһыыбыт. Таба түүтэ түһэн баран атырдьах ыйыгар саҥа үүнэр. Ол тирии намчы, сымнаҕас буолан, ойуутун, киэргэлин кырыйан оҥорорго чэпчэки.  Онон урут таба маҥан, хара тыстарын туһанаары, анаан бу кэмҥэ идэһэлииллэрэ.

Анна Винокурова нэһилиэккэ ыытыллар куонкурустарга өрүүтүн кыттар, бэйэтин оҥоһуктарын быыстапкаҕа туруорар. “Өймөкөөн – тымныы полюһа” бэстибээлгэ аан бастаан ыытыллыбыт “Чуум хаһаайката” куонкуруска эбээн национальнай астарын астаан, кыайыылааҕынан тахсыбыта. Ону сэргэ таба бырааһынньыгар уучаҕынан, сыарҕалаах табанан сүүрдэн, бириистээх миэстэлэргэ тиксибиттээх.

Бэйэтин норуотун национальнай култууратын, тылын-өһүн илдьэ сылдьар Анна Ивановна Винокурова өбүгэ саҕаттан салҕанар норуотун үтүө үгэстэрин аныгы көлүөнэ ыччакка тарҕатар, иҥэрэр.

Источник: https://ulus.media/2020/03/07/jm-k-n-dalbar-hotuna-innetin-iliititten-araarbat-iistenne/

Сигэн:

0
0

Хоруй суох