Бырабыыталыстыба бэрэссэдээтэлэ Андрей Тарасенко Саха сиригэр сылгыны иитии уонна ветеринарнай вакцина оҥоруутун тула кэпсэтии ыытта. Видеокэмпириэнсийэ эрэһииминэн ыытыллыбыт дьүүллэһии Ил Дархан сорудаҕыгар олоҕурда, суруйар СИА.
Тыа хаһаайыстыбатын миниистирэ Александр Атласов иһитиннэрбитинэн, өрөспүүбүлүкэҕэ ааспыт сыл түмүгүнэн 183 тыһыынчаттан тахса төбө сылгы баар. Кини эппитинэн, Ил Дархан ыйааҕынан сылгы төбөтүн 209 тыһыынчаҕа тириэрдэр, сылга 100 сылгы баазатын тутар, сылгы иитиитинэн дьарыктанар исписэлиистэри үөрэтэр үс киини тэрийэр сорук турар.
2020 сылга судаарыстыба бюджетыттан бу хайысхаҕа 330 мөл солк тыырыллыбыт, ол иһигэр 178 мөл солк — федеральнайдааҕыттан үбүлэммит.
Андрей Тарасенко бэлиэтээбитинэн, мунньах кэмигэр киирбит этиилэр хайаан да көрүллүөхтэрэ. Премьер-миниистир эппитинэн, хаһаайыстыбалар дохуоттара уонна эргитиилэрэ улаатарыгар бородууксуйаны батарыы схемата чопчуланыахтаах. Киэҥ ырыынакка тахсыыга уонна рекламаҕа анаан сылгы этин сертификаттыыр наадалааҕын эттэ. Маны сэргэ кини кадры бэлэмнээһиҥҥэ улахан болҕомтону уурары ыйда. Ыччаты сылгы иитиитигэр сыһыарыыга көҕүлүүр бырагыраамалар үлэлиэхтэрин наадатын бэлиэтээтэ.
Сиһилии https://ysia.ru/andrej-tarasenko-rassmotrel-voprosy-razvitiya-konevodstva-v-yakutii/
