Сайсары күөлүгэр «Азия оҕолоро» Оонньуу уотун уматыы сиэригэр-туомугар Эллэй уобараһа, кини кэппит таҥаһын дьон-сэргэ ку-клукс-клан курдук эҥин диэн аймалҕаны, араллааны таһаара сырытта. Онуоха сыһыары тутан Саха театрын режиссера, уус-уран салайааччыта, өрөспүүбүлүкэ сүбэһитэ Андрей Борисов СИА-ҕа маннык быһаарыыны биэрдэ.
«Оонньууну үөрүүлээхтик аһыы быйыл үс сиринэн өрө тахсыылаахтык тэрилиннэ. Ол курдук, «Туймаада» стадиоҥҥа, Сайсары күөлгэ уонна «Орто Дойду» сиригэр-уотугар. Мин бу туруоруулар уус-уран салайааччылара буолабын.
Сайсары күөлгэ Оонньуу уотун умайыыта түбэһиэхчэ буолбатах, Евразия култууратыгар уу, күөл ураты миэстэни ылар. Хас биирдии норуот сүгүрүйэр Ытык күөллээх. Сайсары күөлтэн биһиги норуоппут култуурата саҕаланар. Манна биһиги омукпутун төрүттээбит Эллэй Боотур Ыһыах ыспыт, биэлэрин, аттарын уулаппыт уонна манна туос ураһаны туруорбут. Үһүйээннэргэ кэпсэнэринэн, күөлгэ уот умайан тахсыбыт. Ити уоту Эллэй уолунаан ылбыттарын, үүннээбитттэрин-тэһииннээбиттэрин туһунан үһүйээҥҥэ кэпсэнэр», —диир Андрей Борисов.
«Ку-клукс-клан туһунан этэр буоллахха, маннык уонна маныаха майгынныыр хамсааһыннар бу уобараһы төттөрүтүн саки буойунуттан сүһэн ылбыттара биллэр. Маннык хоройбут бэргэһэ Азияҕа киэҥник тарҕаммытын санатар оруннаах», — диир кини.
