Түөрт сыл устата улуус Оонньууларга күүстээхтик бэлэмнэнэн, элбэх субуотунньуктар ыытыллан, күүтүүлээх сылбыт тиийэн кэллэ. Ол эрээри Амма эбэбит быйыл хаатыттан тахсан, балысхан халаан уута кэлэн, дьиҥ тургутууну ыытан эрэр. Хайдах буолабыт диэн санаа барыбытын үүйэ-хаайа тутар. «Оонньуулар буолаллар дуу суох дуу, дьыла-күнэ көһөрүллэр дуу?» диэн ыйытыылар үөскээтилэр.
Ил Дархан Аммаҕа кэлэ сылдьан, нэһилиэнньэни кытта көрсүһүүтүгэр үөскээбит балаһыанньаны көрөн баран, Оонньуулары кэлэр сылга көһөрүөххэ сөп диэн этии киллэрбитэ, нэһилиэнньэ, олохтоох салалта толкуйдууругар эппитэ. Ити кэнниттэн дьон-сэргэ түмсэн, толкуйдаан баран, үс сыл устата бэлэмнэниллибит үлэ түмүктэрэ баар буолалларыгар, тутуулар кэмигэр түмүктэнэллэригэр эрэллээхтэрин биллэрдилэр. Саха сирин биир бөдөҥ Спартакиадатын Аммаҕа хайаан да быйыл ыытарга диэн санааҕа кэллилэр.
Бүгүҥҥү күҥҥэ Оонньуулар ыытыллыахтаах эбийиэктэрин тутуута, оҥоруута былаан быһыытынан баран иһэр. Онон сиэттэрэн олохтоохтор бэйэлэрэ баҕа санааларынан Ил Дархан Егор Афанасьевич Борисовка көрдөһүү сурук суруйдулар. Бу сурукка аммалар туруоруллубут соруктары толоруохпут диэн эрэннэрдилэр, онон Оонньуулары, республика биир чаҕылхай спортивнай бырааһынньыгын кэлэр сылга көһөрбөтүгэр көрдөстүлэр.
«Саха сирин спортивнай үтүө тэрээһинэ үрдүк таһымнаахтык ааһарыгар биһигиттэн тутулуктааҕы барытын оҥоруохпут», — диэн суругунан бигэ тылларын эттилэр.
