Амма тустууга Андрей Мидловец Монголияҕа ыытыллыбыт норуоттар икки ардыларынааҕы тустууга турнирга чөмпүйүөн аатын сүктэ. Кинини бастакы тренерэ Егор Скрябин, салгыы Илья Солдатов дьарыктаабыттара. Билигин Олимпийскай Эрэл училищетыгар тренер Гаврил Игнатьев эрчийэр.


Амма Чапчылҕаныттан төрүттээх эдэр бөҕөс Андрей Мидловец Улан Баторга ыытыллыбыт норуоттар икки ардыларынааҕы турнирга чөмпүйүөн үрдүк аатын сүктэ. Кини «Азия оҕолоро» Хаҥаласка ыытыллыбыт Саха сирин сүүмэрдэммит  хамаандатын састаабыгар талар күрэхтэһиигэ чөмпүйүөн буолан «Минскэй» матассыыкылынан наҕараадаламмыта.

Бу саас «Саха сирин тимир суоллара» бирииһигэр уонна олимпийскай чөмпүйүөн Павел Пинигин чиэһигэр ыытыллыбыт Уһук Илиҥҥи турнирга эмиэ чөмпүйүөн аатын ылбыта. Кини ыйааһыныгар саамай элбэх 91 бөҕөс киирсибититтэн, кыайыылаах тахсыбыта уонна «Бастыҥ бөҕөс» аатын ылан «Айфон» телефону бэлэх быһыытынан туппута. Кранодарскай кыраай Гулькевич, Татарстан Нижняя Ошма, Дагестан Хасавюрт куораттарыгар норуоттар икки ардыларынааҕы турнирдарга эмиэ ситиһиилээхтик кыттыбыта.

Мидолвецтар Чапчылҕан нэһилиэгэр олорор сэттэ оҕолоох ыал иккис оҕолоро буолар. Кини аан маҥнай иккис кылааска үөрэнэ сылдьан тренер Егор Скрябиҥҥа кэлбитэ. Маҥнайгы кыайыытынан Бөтүҥҥэ ыытыллыбыт хапсаҕай күрэхтэһиитигэр чөмпүйүөн буолуута Андрейы тустуунан дьарыктанарыгар кынаттаабыта. Кини бырааттара Павел уонна Гриша тренер Егор Петровичка эмиэ тустуунан дьарыктаналлар, улууска элбэх ситиһиилээхтэр. Андрей ахсыс, тохсус кылаастарга Аммаҕа киирэн тренер Илья Солдатовка дьарыктаммыта, ол кэмҥэ В.В.Расторгуев аатынан 2№ — дээх орто оскуолаҕа үөрэммитэ. Оттон быйыл олимпийскай эрэл училищетыгар тренер Гаврил Игнатьевка дьарыктана сылдьар.

«Андрей айылҕаттан бэриллибит тустууга талааннаах, олус үлэһит сахалыы тыыннаах, эйгэлээх уол. Тренер сүбэтин истэр, түргэнник ылынар, толорор уратылаах. Сайын  аайы тренер Илья Солдатов Дагестаҥҥа илдьэн дьарыктыыр буолан элбэх уопуттаммыта. Этэҥҥэ дьарыктанан сырыттаҕына киниттэн элбэҕи күүтэбит», — диэн этэр Чапчылҕаҥҥа дьарыктаабыт тренерэ Егор Скрябин.

Ааптар: Алтана Артемьева, Амма улууһа, «Амма олоҕо» хаһыат

3
0
comments powered by HyperComments